Klitschko Mi-TKO Ni Rahman

Cebu - Nilampos ang heavyweight champion Vladimir Klitschko sa pagdepensa sa iyang WBO/IBF/IBO belt human niya gi –TKO ang Amerikanong challenger nga si Hasim Rahman sa seventh round sa ilang sangka niadtong Sabado didto sa SAP Arena sa Mannheim, Germany.

Ang Ukranian boxer nga si Klitschko nangayo lang og 44 segundos sa seventh round aron mapatumba ang kanhi world champion nga si Rahman. Gigamit sa 32- anyos nga si Klitschko ang iyang makabungog nga jabs aron mapahunong si Rahman.

Gipatumba usab sa heavyweight champion ang challenger sa sixth round dihang usa ka right jab ang gipatugpa niini sa suwang ni Rahman, apan ang Amerikanong boksidor nakabarog pa sa maong round.

Si Klitschko nisaka karon sa 52-2, 46KOs nga rekord samtang si Rahman kinsa nahimong sikat human niya gipukan si Lennox Lewis niadtong tuig 2001 ninaug karon sa 45-7, 36 KOs nga rekord.

Sa pagkakaron, si Vitali ug ang iyang igsuon nga si Witali Klitschko, mao ang nagkupot sa upat ka bakus sa heavyweight division. Si Vitali mao ang nagkupot sa WBC heavyweight title.

Ang Russian nga si Nikolai Valuev mao ang nanag-iya karon sa WBA heavy weight belt kinsa gitakdang moatubang sa beteranong si Evander Holyfield karong umaabot nga Sabado.

Kung kinsa ang mogawas nga mananaug sa maong away mao ang atubangon sa managsuong Klitschko alang sa usa ka unificaton bout. - Lemuel P. Maglinte (BANAT NEWS)