Pekeng promosyon ipasusi ni Aldeguer

CEBU - Tinguha karon ni Ala Gym chairman Tony Aldeguer nga susihon ang isyu may kabahin sa pekeng promosyon nga maoy nihikay sa away ni AJ “Basooka” Banal batok sa Korean boxer alang sa usa ka WBO title fight.

Gihimakak ni Aldeguer ang balita nga adunay umaabot nga away si Banal kontra sa usa ka Koreano didto sa Seoul, tungod kay wala siya makadawat og negosasyon mahitungod sa giingong away ug labaw sa tanan wala siya’y gipirmahan nga kontrata.

Gi-awhag karon ni Aldeguer ang chairman sa Games and Amusement Board (GAB) Eric Buhain nga susihon ang pekeng promosyon nga gipublikar sa usa ka Korean promoter.

Apil usab sa gihangyo ni Aldeguer nga pahibaw-on sa GAB mao ang Korean Boxing Commission kalabot sa anomaliya. Gidugang sa ALA Gym chairman nga iya nang gipahibalo ang mga kadagkuan sa World Boxing Organization kabahin sa pekeng promosyon ug iya nang gipadad-an og kopya si chairman Leon Panoncillo sa pekeng poster nga nagbutyag sa away ni Banal sa Korea.

Sa gipadalang suwat ni Aldeguer ngadto ni Buhain, nitug-an kini nga ang maong pekeng promotion mao ang Ho Promotion nga gipanag-iya ni Gyeong Ho Choi. (Arnie P. Atuel)  (BANAT NEWS)