Nakapasulod og krusyal nga lay-up si Inting Reyes ug nakapasulod sab og duha ka free throws si Allan Ricaña sa daginotong oras aron baswaton ang Guadalupe Athletics Association (GAA) All Star ngadto sa 62-57 nga kadaugan batok sa Mandaue Jaycees atol sa gipahigayon nga GAA All Star games kaniadtong Domingo didto sa Guadalupe Sports Complex.
Si Reyes nakadawat og limpyo nga pasa gikan kang Joselito Ocampo alang sa maanindot nga give-and go offensive play ug giwani niya ang duha ka nagdepensa kaniya aron paghatag sa GAA All-Star og 60-57 nga bentaha samtang si Ricaña miselyado sa kadaugan dihang kalma kaayo niyang napasulod ang duha ka free throws sa may otso segundos aron paghatag og 62-57 nga kadaugan.
Ang Mandaue Jaycees nakasikit pa unta sa iskor, 57-58 sa kataposang 42 segundos pinaagi sa basket ni kanhi UC Webmasters point guard Rhett Latonio apan dali kaayong nakasukli si Reyes aron pagsakmit sa labaw. Si Ricaña, ang kanhi USJR Jaguar point guard, nakakubit og foul gikan ni Luther Margallo ug mipasulod sa kataposang basket sa GAA All Star.
Ang presidente sa GAA ug ang playing coach nga si Boy Te nagkanayon nga mao kadto'y unang All Star games nga gipahigayon didto sa Guadalupe ug sa iyang administrasyon lang kini nahitabo.Ila kadtong gihimo agi og lamas alang sa pagsaulog sa Guadalupe fiesta unya sa Disyembre 12.
Sa laing duha ka All Star games, ang Dark All-Star mipukan sa Light All Star, 62-52 alang sa 50 years old above category ug si Freedie Torrepalma maoy napiling MVP.
Sa laing bahin, ang North All Star midaug batok sa South All Star, 75-67 diin ang kanhi commercial player nga si Rey Potot maoy nahimong MVP alang sa mga Class A ug Class B ubos sa 35 years old and below category.
Sa main event, si Reyes maoy naka-angkon sa MVP award ug siya maoy nangu sa GAA All Star sa iyang 12 puntos, lakip niini ang krusyal nga lay-up.
Si Serge Cortes mitampo og 10 puntos alang sa mga batos ni Te samtang maayo kaayong pagkabahin ang ubang puntos. Ang Cebu Movers System ni Te sa GAA wala pa sab makasinati og kapildehan sulod sa tulo ka duwa.
Niadtong Domingo, wala na lang moduwa si Te aron hatagan og taas-taas nga playing time ang iyang mga ginsakopan.
Ang GAA All Star daan nang gusto gyud modaug human ilang gibiyaan og 13 puntos ang Mandaue Jaycees sa halftime, 33-20. Ang iskor nga 57-58 human sa tirada ni Latonio, maoy pinakasikit alang sa Mandaue Jaycees.
Si Edgar Colina mihakot og 18 puntos aron pangulohan ang Mandaue Jaycees samtang si Latonio, ang igsoon sa kanhi USP Panther nga si Jett, mihipos og 11 puntos.
Gihatagan ni Te og plaque of appreciation ang mga sakop sa Mandaue Jaycees tungod sa pagsanong sa ilang imbetasyon aron mahimong mabulokon ug malampuson ang ilang gihimong GAA All Star weekend.
Sa sayo pa, ang kanhi SWU Cobra nga si Alvin Plaudin mi-iskor og 21 puntos aron mahimong 3-Point Shootout king.
Puntos kada usa:
GAA All Star (62) --- Reyes 12, Cortes 10, Ocampo 8, Ararao 7, Ricaña 6, Barrios 6, Celestial 4, Sasing 2, Dula 2, Cabradilla 2, Escuyos 2
Mandaue Jaycees (57) -- Colina 18, R. Latonio 11, Margallo 10, Latonio 7, Balbuena 1 Halftime: 33-20.