De la Cruz pakyas pagsakmit sa WBO Oriental super featherweight belt

CEBU - Gipatumba sa kanhi three-time world title challenger Terdsak Jandaeng sa Thailand sa makaduha ka higayun ang pambato sa Wakee Salud Stable nga si Joel de la Cruz aron mopatigbabaw sa ilang binukbukay pinaagi sa unanimous decision sa main event sa “Daytime Boxing 2: Thai Invasion” kagahapon didto sa Mandaue City Cultural and Sports Complex.

Ang Thailander milampos pagsakmit sa WBO Oriental super featherweight championship atol sa iyang pagpanulong diri sa Sugbu. Si Jandaeng mipatugpa sa iyang mga kusog nga kombinasyon ngadto sa lawas ni De la Cruz maoy hinungdan sa pagkalup-og niini sa second round, gisundan kini sa usa ka left hook ngadto sa hawak nga mipahagsa usab sa Pinoy ibabaw sa ring sa round three.

Si De la Cruz misuway pagsukol sa round seven, uban ang one-point deduction nga gipahamtang ni referee Tony Pesons ngadto ni Jandaeng human sa low blow niya ngadto sa Pinoy apan dili kini igo aron masakmit niya ang bakus.

Igo nalang sa pagsagang ang lumad nga taga Sibugay, Zamboanga del Norte sa mga sukmag sa beteranong si Jandaeng paingun na sa katapusang round sa away.

Paghuman sa ilang sangka, duha ka mga hurado ang mi-iskor og 117-108 ug 115-110 pabor ngadto ni Jandaeng samtang usa ka hurado ang mi-iskor og 114-112 ngadto ni De la Cruz.

Tungod sa iyang kadaugan si Jandaeng misaka ngadto sa rekord 32-3-1, 21KOs samtang si De la Cruz natagak ngadto sa 10-6-1, 4KOs nga rekord.

Sa undercard, ang WBO Oriental featherweight king Eric Canoy midaog usab batok ni Abner Llasa, samtang si Federico Catubay mipahunong usab ni Sirichai Kokietgym.

Ang batan-ong si ‘Marvelous’ Marvin Sonsona mi-TKO ni Richard Picardal sa fifth ug si Rolando Magbanua of Braveheart Boxing mipukan ni Thiti Sithkosol. - Lemuel P. Maglinte (BANAT NEWS)