Tigers Nakabiktima Na Usab

Cebu Midnight Run Mikulit na usab og laing daog ang Coca Cola Tigers dihang ilang gikuniskunis ang Rain or Shine Elasto Painters sa iskor nga 81-73, sa nagpadayong aksiyon sa KFC -PBA Philippine Cup pagkagabii didto sa Cuneta Astrodome, Pasay City.Gitinuod sa Tigers ang ilang bahad nga mudaog karong adlawa batok sa Elasto Painters aron sugdan ang ilang winning-streak sa liga. Ang Tigers nga nagtangag na karon og 5-7 win-loss nga baraha mihinay-hinay na og kamang ngadto sa standing aron mapalambo ang ilang standing sa elimination round. Sa sayung bahin sa duwa, mipatuman dayun sa ilang opensiba ang Tigers sa pagpangulo sa 6-foot-9 sentro nga si Asi Taulava kinsa mibugha og 12 puntos sa first- half aron makuha sa Tigers ang singko puntos nga labaw, 40-35 padulong ngadto sa third quarter.

Gawas ni Taulava laing mi-iskor og double-digits alang sa Tigers mao ang forward nga si Mark Telan nga mipugnit og 14 puntos ug Ronjay Buenafe nga midunol og 11 puntos.

Ang produkto sa University of Hawaii nga si Alex Cabagnot mao ang napiling player of the game alang sa Tigers dihang mibandera kini og double-double, 15 puntos ug 11 ka assist.

Sa laing bahin ang napildeng Elasto Painters ni coach Caloy Garcia niangkon nga wala sila makalahutay sa nagdilaab nga opensiba sa Tigers, ang Painters igo lang nirehistro og 73 puntos layo sa ilahang 90.0 average points matag duwa. Ang rookie nga si Solomon Mercado maoy nangulo sa Painters pinaagi sa pagposte og 13 puntos gisundan ni Mark Isip nga adunay 12 puntos ug Rob Wainwright nga mipuga og 10 puntos, nga natagak karon sa ikalimang dapit sa ilahang 6-6 win-loss nga baraha.

Padayon pa ang engkuwentro sa duha ka mga lig-on nga koponan nga mao ang Purefoods Tender Juicy Giants batok sa San Miguel Beermen sa pagsuwat niining balita. – BANAT NEWS