Gio Electric Motors mikulit og rekord

CEBU - Gibanatan sa Gio Electric Motors ‘88 ug walay kukaluoy nga milubong sa Kidneycare ‘87, 114-71 sa 2008 University of San Carlos Boy High Alumni Basketball Association (USCBHABA) Atan Guardo Barkadahan Cup didto sa USC-North Campus gym.

Sayo nga naglawig ngadto sa kadaugan ang Gio Electrical Motors ‘88 sa dihang miposte kini og 41-19 paghuman sa unang 10 minutos sa duwa.

Gawas sa kadaugan, ang Gio Electric Motors ‘88 mikulit sab og rekord sa liga nga nakahimo og dakung iskor sud lang sa usa ka kuwarter ug nakapahamtang og labing daku nga lubong ngadto sa kontra nga 43 puntos.

Lima ka players ang milansang og double figures alang sa Gio Electric Motors ‘88 nga gipangulohan ni Edmund Odulio. Ang guwardiya nga si John Andrew Auza mibolit og 16 puntos, gisundan ni Ray Pagapulaan sa iyang 15 puntos, si Dindo Sausa mitimbre og 14 puntos, samtang si Raul Monterroyo miabuno og 13 puntos.

Sa laing aksiyon, ang RWC ‘91 nagsalig sa ilang walay puas nga kusog sa nanghinapos nga bahin sa duwa aron pagpukan sa Fabio Salsa ‘92 sa iskor nga 74-69.

Puntos Matag Usa

Unang duwa:

Gio Electric Motors (114) - Odulio 28, Auza 16, Pagapulaan 15, Sausa 14, Monterroyo 13, Tajanlangit 10, Reyes 6, Saso 6, Pilapil 3

Kidneycare (71) - Aluem 24, Simene 13, De los Cientos 10, Tabares 7, Burila 7, Delantar 4, Honorio 2, Derecho 2, Bajarias 2

Ikaduhang duwa:

RWC (74) - Concepcion 20, Alonte 17, Toledo 17, Arong 8, Jacobe 8, Batdok 2, Abelgas 2

Fabio Salsa (69) - Pagador 29, De Leon 14, Olvido 11, Alcover 5, Campos 4, Guardo 4, Alo 3, Tan 2, Inocencio 2. – BANAT NEWS