CEBU - Nagmalampuson ang Liloan, ang unang municipalities champion sa Governor Gwen Garcia Unity Volleyball (GUV) Cup for Women pagdepensa sa ilang cluster 6 title niadtong Domingo didto sa lungsod sa Cordova, dakbayan sa Lapu-Lapu.
Gitapos sa Liloan ang usa ka adlaw nga aksiyon pinaagi sa pagposte og 3-0 nga baraha.
Nidaog ang Liloan pinaagi sa default batok sa Consolacion ug dayon mikulit og daog batok sa host Cordova, 25-14, 25-15.
Ang Consolacion volleybelles diha sa binyu, apan wala kini moduwa sa wala masayri nga katarungan.
Sa engkuwentro sa walay pildeng mga koponan, ang Liloan milampurnas sa Compostela, 25-18, 25-13 aron pagsakmit sa korona.
Karong Sabado, ang aksiyon sa GUV Cup dad-on didto sa Bogo alang sa city cluster. (BANAT NEWS)