"Physmencon" training gipasiugdahan sa CEVBRO

CEBU - Ang bag-ong grupo sa mga referees -- Central Visayas Basketball Referees Organization (CEVBRO) nga maoy nag-officiate sa bag-o lang natapos nga 8th Cebu Schools Athletic Foundation, Inc. (CESAFI), kasamtangang nagpahigayon sa ilang physical mental conditioning training kon "physmencon" training matag adlaw'ng Sabado gikan sa alas-6 hangtod sa alas-8 sa buntag anha sa San Nicolas covered court.

Ang kalihukan bukas alang sa tanang mga interesado nga mahimong referee ug gustong mahisakop sa maong grupo.

Usa ka oras ang gigahin alang sa physical conditioning ug usa sab ka oras alang sa mechanics ug sa mga lagda sa basketbol (amateur rules) gikan sa FIBA.

Gitumong ang maong kalihukan aron sab sa pag-upgrade sa mga referees kabahin sa ilang kasinatian sa officiating ug pagpangandam alang sa umaabot nga mga torneyo.

Nahimo ang maong kalihukan ubos sa pagpaluyo sa mga opisyales sa CEVBRO nga gipangulohan sa ilang presidente nga si Ed Aguello, Melvin Caumeran (vice president), Jimmy Ibañez (secretary), Jorge Insila (treasurer), James Diano (auditor) ug sa mga advisers nga sila si CESAFI deputy commissioners nga si Danny Duran ug Fil-Canadian coach nga si John Feliciano.

Alang sa dugang mga kasayoran mahitungod sa CEVBRO, mahimong motawag sa telepono 4136075 o mo-text sa 09166104136. – BANAT NEWS