CEBU - Agi'g pagtamod sa All Saint's Day ug All Soul's Day, walay ipahigayong duwa ang Guadalupe Athletic Association (GAA) ubos sa ilang presidente nga si Dr. Boy Te.
Ang mga aksiyon mobalik unya pa sa Nobiyembre 9 diha gihapon sa Guadalupe Sports Complex sa barangay Guadalupe, ning siyudad.
Ning bag-o, ang GAA mipasiugda og Christmas League nga gibuksan niadtong Domingo diin 16 ka teams nga gibahin sa duha ka grupo ang mosalmot.
Ang mga teams nga nahisakop sa Group-A mao ang Agencia Grande, Pecus Stallions, Tigers, Pan Borikat, Sign Post Ads, Evan Hulga, 2171 Platoon ug Team MELO.
Samtang ang nagtapok sa Group-B mao ang Cebu Movers, MC Mill, AC Sports, Aqua Serv, Ramboys, MGR Consultants, G&S International ug Swan.
Ang championship game sa GAA Christmas League itumong sab sa ilang Christmas party sa wala matino nga petsa. – BANAT NEWS