3rd CESAFI-Partner's Cup sugdan sa Enero 4

CEBU - Gikauyonan na nga ikatulong season sa Cebu Schools Athletic Foundation, Inc. (CESAFI) Partner’s Cup gikatakdang buksan unya sa Enero 4, 2009 diha sa Cebu Coliseum.

Mao kini ang gibutyag ni CESAFI commissioner Felix O. Tiukinhoy Jr.

Ang mga teams nga mosalmot mao ang eight-time CESAFI champion University of the Visayas (UV) Green Lancers, University of San Jose-Recoletos (USJ-R) Jaguars, University of San Carlos (USC) Warriors, Southwestern University (SWU) Cobras), University of Southern Philippines Foundation (USPF) Panthers, University of Cebu (UC) Webmasters, Don Bosco Technology Center (DBTC) Greywolves ug ang Cebu Institute of Technology (CIT) Wildcats.

Ang pagsalmot sa mga CESAFI teams gi-aprobahan sa mga sakop sa CESAFI board atol sa ilang board meeting niadtong Oktobre 23 didto sa Chibori Restaurant.

Ang commissioner sa Partner’s Cup mao si Ramon 'El Presidente' Fernandez ug ang tigpasiugda mao sila si Tiukinhoy ug si Atty. Baldomero C. Estenzo.

Ang makampiyon sa maong torneyo makadawat og P30,000, ang second placer makaangkon og P20,000 ug ang ikatulo mobulsa og P10,000.

Ang mga players nga makaduwa pa alang sa CESAFI 2009 season mahimong makaduwa sa Partner’s Cup, apan players nga mogradwar sunod tuig dili na tugotan sa pagduwa.

Ang DBTC, USPF ug CIT gitugotan pagdugang og lima ka players gikan sa alumni isip re-enforcements, samtang ang laing 10 ka players naggikan sa ilang kasamtangan nga roster.

Ang CESAFI format maoy gamiton sa Partner’s Cup ingon man sab ang mga lagda. 

Ang Partner’s Cup pagaduwaon matag adlaw'ng Sabado ug Domingo diin adunay upat ka mga duwa ang ipahigayon matag playing date. -BANAT NEWS