Cebu Niños Mitamparos sa Davao

CEBU - Gitamparos sa M. Lhuillier Kwarta Padala-Cebu Niños ang Montana Pawnshop sa Davao, 91-85 aron paghari sa pre-season games sa Smart-Liga Pilipinas Second Conference niadtong miaging gabii didto sa Bangangga, Davao del Norte.

Ang Cebu Niños ni team owner Michel Lhuillier ug multi-titled coach Raul ‘Yayoy’ Alcoseba, nga miharos sa tanang upat ka legs aron pagsakmit sa First Conference title sa liga sa miaging bulan, nakalusot sa final human maka-ikyas sa Misamis Oriental (MisOr) Meteors ni Gov. Oscar Moreno, 77-72.

Sa pagka tinuod, ang Cebu Niños nitapos isip second seed paghuman sa classification round nga adunay 2-1 win-loss record. Ilang gipilde ang MisOr sa iskor nga 67-66 ug Lipa-Batangas Barakos sa iskor nga 92-72, apan miyukbo kini sa Montana Pawnshop, 78-82.

Ang Cebu Niños mo-host sa Visayas leg sa Liga pre-season games karong Nobiyembre 13-16 diha sa Cebu Coliseum.

Gawas sa Lipa ug MisOr, moapil sab ang Taguig-Batang Global ug Smart-Pampanga Buddies.

Ang second conference sa Liga Pilipinas gikatakdang mosikad karong Nobiyembre 20. – BANAT NEWS