Lasala hari sa LBL All-Star slam dunk

CEBU - Ang wala maangkon ni 'Junjun' Lasala sa University of the Visayas (UV) Green Lancers sa miaging Cebu Schools Athletic Foundation, Inc. (CESAFI), iyang nakuha didto sa Lapu-Lapu City.

Si Lasala Jr. ang junior swingman sa UV Green Lancers, kinsa niduwa sa Lear Marketing sa Lapu-Lapu Basketball League (LBL) seniors open category maoy nidaog sa LBL All-Star Slam Dunk crown niadtong miaging adlaw.

Si Lasala nakakuha og perfect score 30 points sa iyang first attempt, miposte siya og 28 sa ikaduhang attempt  sa kinatibuk-ang 58 puntos, ang labing taas sa unom ka mga partisipante.

Sa iyang ikatulo ug final dunk, si Lasala mi-iskor og laing 30 puntos alang sa kinatibuk-ang 88 puntos ug iyang gikabagat ang second highest scorer nga si Rowen Tagalog nga adunay 78 puntos.

Si Lasala, usa sa mga pambato sa slam dunk competition sa miaging 8th season CESAFI All-Star sa milabay’ng bulan, apan pakyas kini paglangkat sa titulo human mapilde ni rookie nga si Elwin Durano sa University of Southern Philippines-Foundation (USPF) Panthers.

Si Lasala nakadawat og P5,000   gikan ni LBL sports committee chairman Harry Radaza.

Nianang pagka-gabii, ang Light All-Star nga gipangulohan ni Alex Cainglet ubos ni coach Cromwell Kwan milampaso sa Dark All-Star ni coach Glenn Bercede sa iskor nga 133-118.  (BANAT NEWS)