Guardo mipasidaan ni Donaire

CEBU - Gipasidan-an ni sports patron Jonathan ‘Atan’ Guardo si IBF/IBO flyweight champion Nonito ‘The Filipino Flash’ Donaire nga magmabinantayon sa iyang away batok ni South African champion Moruti Mthalane nga iyang gihulagway nga labing lig-on ug labing delikadong challenger.

Si Donaire gikatakdang mohimo sa iyang ikaduhang pagdepensa sa iyang kaluhang kalibotanong titulo batok sa mangtas nga si Mthalane karong Nobiyembre 1 didto sa Mandalay Bay Resort and Casino sa Las Vegas, Nevada.

“I have high confidence on Donaire’s ability, but he must be extra careful against Mthalane because based on the reports I’ve read in local papers and on the internet, the South African is a very tough and deadly fighter. Mthalane’s menacing record speaks for itself,” matud pa ni Guardo, ang presidente sa Uniherb Philippines nga adunay six-fight contract uban ni Donaire isip official endorser sa Arthro.

Gikuhaa’g basi ni Guardo mao ang rekord nga gihuptan ni Mthalane, kinsa adunay 22 ka daog diin 15 sa iyang mga biktima pinaagi sa KOs, samtang usa pa lang ang pilde niini.

Hinuon, una pa kini niyang higayon nga moaway sa Estados Unidos nga nakahatag og dakung bentaha ni Donaire, kinsa nagbitbit sab og impresibong 19-1 win-loss record ug 12 sa iyang daog pinaagi sa KOs.

Si Donaire wala na maka-away dul-an na sa usa ka tuig, apan bisan pa niini, wala kini makaapekto sa iyang performance tungod kay todo-ensayo man siya alang ning iyang away batok ni Mthalane.

Katapusang niaway si Donaire niadtong Disyembre 2 sa miaging tuig didto sa Connecticut diin nidaog siya batok ni Mexican Luis Maldonado pinaagi sa eighth round stoppage. Mao kadto ang iyang unang pagdepensa sa korona nga iyang nailog gikan sa mga kamot sa kanhi way pildeng Australian KO artist Vic ‘The Raging Bull’ Darchinyan pinaagi sa fifth round KO niadtong Hulyo 7, 2007. – BANAT NEWS