CCC-CSD unang misakmit sa korona

CEBU - Kugi sa depensa ug sobsob nga paningkamot maoy hinagiban sa Carmen Copper Corporation-Construction Services Department (CCC-CSD) Builders pagpukan sa Survivor's Team, 80-71 aron pagsakmit sa 1st Aloguinsan Mayor’s Cup Open tournament niadtong Domingo sa gabii didto sa Alodome sa lungsod sa Aloguinsan, habagatang Sugbu. 

Nahimong bayani sa CCC-CSD mao si Jared Kane Abatayo   pinaagi sa duha ka steals ug pagpasulod og crucial baskets sa nanghinapos nga bahin sa duwa.

Si Abatayo, kanhi UC Webmasters mi-iskor og 16 puntos aron santaon ang mga panghulga sa Survivors.

Ang Builders ni coach Boboy Cal, milabaw og 10 puntos, 69-59 sa katapusang unom ka minutos sa duwa, apan nakan-an kini luyo sa paningkamot ni Rino Berame sa iskor nga 67-69 sa katapusang dos minutos.

Nakaginhawa og lawom ang Builders nga miposte og siyete puntos nga labaw. Sila si Abatayo ug Jerry Jaca maoy miselyado sa kadaugan.

   Si Jaca maoy nangu sa Builders sa iyang 24 puntos, si Aldrin Ocañada mihakot og 17 puntos, samtang si Abatayo mihipos og 16 puntos.

Sila si Berame ug Lyndon Gudez mihipos og 17 puntos matag usa aron pangulohan ang pilderong Survivors. 

Sa laing aksiyon, ang Talavera team nidaog dihang naka-ikyas kini sa kulbahinam nga duwa batok sa Mandaue City, 105-104

Si Ronan Isidro nagmangtas ug mipabuhagay og 43 puntos, samtang si Rowen Tagalog mibahog og 34 puntos alang sa Talavera aron pag-angkon sa ikatulo nga dapit.

Si Frangel Omolon maoy nangu sa Mandaue pinaagi sa iyang 19 puntos, gisundan ni Elvis Labares nga miamot og 16 puntos ug Vergel Abelong nga miamot og 15 puntos.

Ang ganting salapi madawat karong Oktubre 24 awarding rites nga pagatambongan ni Gobernadora Gwendolyn 'Gwen' Garcia uban ni Aloguinsan Mayor Cynthia Moreno, sports chairman   Mariolito Biton ug uban pa nga mga opisyales.

PUNTOS MATAG USA

Unang duwa:

Talavera (105) -- Isidro 43, Tagalog 34, Tarona 8, Demotor 8, Tangarorang 5, Villanueva 4, Fuentes 4

Mandaue (104) -- Omolon 19, Labares 16, Abelong 15, Singson 11, Daculan 11, Jueves 10, Bercede 8, Demape 7, Pagasian 4

Ikaduhang duwa:

CCC-CSD (80) -- Jaca 24, Ocañada 17, Abatayo 16, Sayson 8, Nailon 4, Redulosa 4, Mangyao 2, Montalbo 2, Sereño 2

Survivors (71) -- Berame 17, Gudez 17, Almonte 14, Maloloy-on 13, Canillo 4, Diputado 4, Mercado 2, Lanutan 2 (BANAT NEWS)