CEBU – Ang Sugboa-anong coach nga atua na mag-base sa Manila nga si Britt Carlo Reroma ug ang iyang mga batan-ong players sa San Beda Red Cubs small basketeers gikatakdang molarga padulong sa Bali, Indonesia karong umaabot nga Oktobre 22 aron pagsalmot sa FIBA 3-on-3 Basketball 1st Asian Beach Games.
Ang Red Cubs kinsa misalmot sab sa maong matang sa torneyo nga Nike 3-on-3 basketball tournament didto sa Las Vegas, Nevada kaniadtong summer, moduwa og katulo sa elimination una pa sila maka-abante sa sunod nga round.
Mo-asdang dayon kaduha ang Red Cubs (RP Team) atol sa pagbukas sa torneyo unya sa Oktobre 24—— una batok sa Macau sa alas 9 sa buntag ug dayon batok sa Thailand sa alas 4 sa hapon sa mao gihapong adlaw.
Sa sunod adlaw Oktobre 25, makigsangka ang Red Cubs batok sa Japan, ang gituohang maoy paborito nga mosakmit sa korona.
Ubos sa uniporme sa RP Team, ang Red Cubs anaa mahimutang sa Group B kauban ang Japan, Thailand ug Macau samtang ang Group A gilangkuban sa India, Malaysia, Singapore ug host Indonesia.
Sa maong torneyo, tulo lang ka quarters nga magduwa ang mga players ug may tagal nga lima ka minutos mata’g quarter ug ang team nag unang makakuha’g 33 puntos maoy ilhong mananaug.
Upat lang ka personal fouls ang itugot sa mata’g player ug mo-foul out na siya ug aduna sa’y three teams ang mata’g team alang sa penalty imbes lima ka team fouls.
Ang top qualifier sa mata’g bracket maoy mag-ilog sa gold medal samtang ang ubang mga partisipante igo na lang moduwa alang sa tagsa-tagsa ka placing.
Ang Red Cubs ni Reroma gilangkuban nilang Joel Tolentino, Samuel Marata, Philip Paredes ug Arthur dela Cruz. Ang nagpaluyo sa ilang biyahe mao sila si Samahang Basketbol ng Pilipinas (SBP) President Manuel V. Pangilinan, SBP executive director Noli Eala ug Youth Commission chairman Nick Jorge, kinsa mao sab ang founder sa Milo-Basketball Efficiency Scientific Training (MILO-BEST) Small Basketeers of the Philippines-Passarelle. – Gabby G. Malagar (BANAT NEWS)