Cebuanos mosuway sakmit og luna
CEBU - Suwayan sa lima ka masaarong tennis players sa Sugbu nga haruson ang gitaganang luna sa Milo National Qualifying alang sa Malaysia circuit karong adlawa didto sa San Beda College sa Alabang.
Sila mao si Sally Mae Siso, Jana Pages, Adrian Parangan, Fritz Satera ug Christopher Encarnacion.
Ang tanan pulos first timers gawas lang ni Sally Mae Siso.
Sila si Encarnacion, Pages ug Parangan mipakita og maayong labok sa bag-o lang natapos nga 13th Milo Little Olympics.
Sila si Pages ug Parangan moduwa sa 12-under division, si Encarnacion mokumbati sa 10-under, samtang sila si Satera ug Siso mowadwad sa 14-under division.
Kini maoy katapusang tuig ni Siso nga mopakita'g aksiyon sa maong kompetisyon kay ang Malaysia circuit alang lamang sa mga magduduwa nga nagpangedaron og 14-anyos ug paubos.
Si Siso sa University of San Carlos-South Campus kanunay'ng mohakot og mga bulawang medalya sa panahon nga moapil kini sa Malaysian circuit hinungdan nga siya'y nidaog sa "Athlete of the Year" award sa Sportswriters Association of Cebu (SAC). (THE BANAT)
- Latest
- Trending
