Marquez bag-ong hari sa lightweight division

CEBU – Bisan pa sa pagsaka niya sa mas bug-at nga lightweight division, gipamatud-an ni Juan Manuel ‘Dinamita’ Marquez (49-4-1, 36 KOs) nga angay gihapon siyang kahadlokang boksidor sa tibuok kalibutan.Kini human niya gipalukapa ang kampiyon nga si Joel ‘El Cepillo’ Casamayor (36-4-1, 22 KOs) aron pagsakmit sa Ring Magazine lightweight belt atol sa ilang away kagahapon sa main event sa “The Challenge” didto sa MGM Grande Garden Arena, Las Vegas City.

Dali lang alang sa 35-anyos nga Mehikanong boksidor ang pagpasulod sa iyang mga kinumo ngadto kang Casamayor nga miresulta sa pagkagisi sa tuong kilay niini sa round four sa ilang away. Pag-abot sa 11th round sa ilang binakbakay, mipahaguros si Marquez og mga kinumo nga miresulta sa pagkatumba sa Cuban boxer, misuway pagbangon ang naglipong-lipong nga si Casamayor apan gitiwasan siya ni Marquez nga maoy hinungdan sa pagkahayang pag-usab niini ibabaw sa ring.

Sa iyang bahin, ang 37-anyos nga si Casamayor nibahad nga dili kini ang kataposang panagharung nila ni Marquez ibabaw sa ring. “I fought as a champion, but Marquez was the best this night, I deserve a rematch. Marquez knew how to control my punches. I had a bad night. I’m very emotional right now, but I honestly need rematch.” matud pa ni Casamayor.

Sa supporting main event, gi-ilog pagbalik sa 37-anyos nga si Vernon Forrest ang World Boxing Championship (WBC) super welterweight championship kini human niya gipilde ang Mehikanong si Sergio Mora sa ilang rematch pinaagi sa 12- round unanimous decision.Gipahunong ni Victor Ortiz ang Argentinian nga si Roberto Arrieta sa fifth round sa ilang away, samtang ang super middleweight nga si Danny Perez mipukan ni Julio Garcia pinaagi sa unanimous decision. – BANAT NEWS