Sun Valley nagbitbit og 3-0 paghuman sa elimination

CEBU - Ang Sun Valley dribblers ni sports patron Atan Guardo mitapos sa elimination round sa Banawa Residents Athletic Association (BRAA) pinaagi sa paglubong sa Greenbank-Fuente, 92-75 didto sa Banawa open court.

Tungod kay nakaproblema sa field shooting, ang mga batos ni Guardo namawi sa ilang gikusgon ug kaabtik pinaagi sa fastbreak points.

Ang Sun Valley biya og dos puntos, 40-42 sa halftime, apan kalit nga misilaub ang ilang kainit sa pagsugod sa third period ug nasakmit ang abante sa iskor, 66-62. Gikan niadto wala na sila magpahulga ang Sun Valley hangtod nga naangkon ang kadaugan.

Sila si Michael Cinco ug Richard Gubaton nangu sa Sun Valley. Si Cinco mi-iskor og 20, gisundan ni Gubaton ug Panerio nga pulos adunay 14 puntos. 

Ang Sun Valley maoy nanghawod sa Group-C paghuman sa eliminasyon bitbit ang 3-0 nga baraha.

Ang Yob Kala nga gipanag-iya sab ni Guardo mao sab ang nangulo sa Group A bitbit ang 2-1 win-loss record. 

PUNTOS MATAG USA

Sun Valley (92) -- Cinco 20, Gubaton 14, Panerio 14, Villarosa 8, R. Panerio 8, Comedero 8, Calum 6, Mukhadani 6, Arciaga 4, Lanutan 3,Labay 1

Greenbank-Fuente (75) -- Maloloy-on 24, Arnel 11, Henry 7, Albert 6, Rufino 6, Richard 6, Gonenez 4, Junior 4, Victor 4, Joey 2