AMBL nakalikay sa Jo-Nel's Trucking, 113-108

CEBU -Ang team AMBL ni Allan Lim naka-eskapo bitbit ang 113-108 nga kadaugan batok sa Jo-Nel’s Trucking ni Joey Cal sa pagbukas sa Punta Princesa Sports Association (PPSA) Businessmen’s Cup 2008 niadtong Miyerkules didto sa Vicente Sotto Memorial Complex sa barangay Punta Princesa ning dakbayan.

Sa laing duwa, ang Three B nga gipaluyohan sa Bucton, Bacla-an ug Baisac, mipukan sa BIAR, 81-74.

Nabiyaan og otso puntos, 20-28 paghuman sa first period, ang AMBL ni-outscored sa Jo-Nel’s sa second quarter, 30-20 aron pagsakmit sa labaw, 50-48 sa halftime.Gipamatuod nila ni Lito Navarro ug Robert Abasolo nga angay silang kahadlokan dihang nagkumboya kini og 50 puntos.Si Navarro mipupo og 30 puntos, samtang si Abasolo adunay 20 puntos.

Sila si Argel Magan, Louie Navarro, Jimbo Noel ug Lim pulos sab mitampo og double figures alang sa AMBL.

Ang Jo-Nel’s gipangulohan nila ni Opong Zafra ug Cesar Ortega nga nagkumboya og 52 puntos.

Sa laing bahin, si Rondyll Roncal kinsa mibahog og 30 maoy nangulo sa Three-B, gipaluyohan sab siya sa kanhi UC stars Alex Armenion ug Reggie Licanda nga pulos miposte og 10 puntos.

Si Jason Estrella mao sab ang nangu sa BIAR sa iyang 18 puntos, samtang si Rommel Hapin mibugha og 14 puntos.

Puntos Matag Usa

Unang duwa:

AMBL (113) -- L. Navarro 30, Abasolo 20, Magan 17, Navarro 15, Lim 10, Noel 10, Tecson 3, Quiroz 3, Alesna 2, Jumamil 2, Monreal 2

Jo-Nel’s (118) -- Zafra 27, Ortega 25, Naron 23, Arias 11, Paca 6, Villarta 6, Elizondo 4, Cal 2, Ciabo 2, de Gracia 2

Ikaduhang duwa:

Three-B (81) -- Roncal 30, Armenion 10, Licanda 10, Lastimoso 10, Diola 4, Pahamutang 4, Abarrientos 4, Bucton 4, Queta 3, Aniñon 3, Bacla-an 2

BIAR (74) -- Estrella 18, Hapin 14, Ricarte 13, K. Arellano 12, Pagunatalan 7, Caballes 6, A. Arellano 4 - BANAT