Montessori nanghawod sa 3rd VISSA Inter-school swimfest

Ang Montessori International School (MIS) maoy midaog sa overall champion sa elementary division sa 3rd VISSA Inter-school Swimming Competition ning bag-o didto sa CPG Sports Complex sa Tagbilaran City.

Sila si Jan Paulo Pitogo ug Danielle Angela Biscocho maoy nangulo sa MIS nga mihakot og upat ka golds ug usa ka silver matag usa. Si Pitogo mibanat ubos sa boys 9-10 category ug si Biscocho sa girls 8-under division.

Gawas sa individual golds, si Pitogo mikabkab sab og duha ka bulawan pinaagi sa 200m ug 400m medley relays. Kauban ni Pitogo sa relay mao sila si Serge Patrick Biscocho, Gian Mikael Gonzaga, Myles Chi ug Akihiro Hara.

Si Biscocho mao sab ang migiya sa iyang team pagkutlo og usa ka gold ug duha ka silvers sa relay.

Si Nikko Rafael Pitogo midugang og bulawan sa kampanya sa MIS pinaagi sa pagtunol og tulo ka golds, usa ka silver ug usa usab ka bronze, ingon man si Ramsey Macawile nga mitunol og duha ka golds, duha ka silvers ug usa ka bronze. Si Gian Mikael Gonzaga miligwat og usa ka gold, tulo ka silvers ug usa ka bronze, si Magale Matthew mitunol og usa ka gold ug tulo ka silvers ug si Mercy Issa Priagula mihakot og duha ka golds ug tulo ka silvers.