Title defense ni Gerry gikansel

Kanselado ang pagdepensa ni Gerry Peñalosa sa iyang WBO bantamweight title batok sa Mehikanong si Nestor Rocha nga gikatakda unta karong Septiyembre 20 didto sa Mindanao Civic Center sa Tubod, Lanao del Norte gumikan sa sitwasyon sa kahapsay ug kalinaw didto sa Mindanao.

Bisan og layo ra ang Lanao del Norte sa North Cotabato diin nagkainit ang tensiyon tali sa mga sundalo sa kagamhanan ug sa Moro Islamic Liberation Front (MILF), nakahukom ang mga organizers sa maong promosyon nga dili mosugal sa risgo ilabi na sa pagdala sa maong daku kaayong kalihukan.

"We are dealing with this situation the best way we can, and we are still trying to resort to our other plans," matud pa ni promoter Sammy Gello-ani segun sa taho sa philboxing.com.

Sa iyang bahin, si Peñalosa naglantaw sa uban niyang opsiyon ug usa niini ang pagbalhin sa away dinhi sa dakbayan sa Sugbu.

Nagkanayon si Gello-ani nga usa sab kini sa iyang nahuna-hunaan apan ang problema kay ang Golden Boy Promotions interesado nga mosal-ot ni Peñalosa sa undercard sa bugno nilang Juan Manuel Marquez ug Joel Casamayor karong Septiyembre 13 didto sa Las Vegas.

Ang 36-anyos nga si Peñalosa (53-6-2, 36KOs) manalipod sa ikaduhang higayon sa WBO bantamweight title nga iyang nasakmit human patikangkanga sa ikapitong hugna ang kanhi kampiyon nga si Jhonny Gonzales sa Mexico atol sa Boxing World Cup niadtong Agosto  sa miaging tuig didto sa Arco Arena sa Sacramento, California.