Black nidaog sa double overtime
Nanginahanglan pa og duha ka overtime ang Black team una nila maangkon ang kulbahinam nga kadaugan batok sa Blue team, 90-89 sa 2nd Conference sa Basketball Association of Ramos (BAR) niadtong miaging gabii didto sa Cogon-Central Ramos Sports Complex.
Ang sinaligan sa Blue nga si Noel Jimbo mikulit og 13 puntos sud lang sa ikaduhang kuwarter hinungdan nga ilang nailog ang labaw, 41-38 paghuman sa first half.
Nahabwa ang gitagoang abilidad sa Black diin ilang gipahamtangan og makabungog nga opensiba ang Blue aron pag-ilog og balik sa labaw, 57-53 sa third quarter.
Nahimong kulbahinam ang duwa sa katapusang kuwarter dihang ang duha ka kampo nagsinukliay og mga puntos hinungdan nga nagkatabla kini paghuman sa regulasyon. SiMarcos Lugod maoy responsable sa unang overtime human sa iyang basket sa nahabiling singko segundos sa duwa.
Sa overtime, nagpuli-puli og pasulod sa ilang opensiba ang isig ka habig hangtod nga nagkatabla na sab kini, 80-all aron pagpuwersa sa duwa ngadto sa double overtime.
Sa ikaduhang overtime, wala na magpabangbang ang Black ug ilang giangkon ang kadaugan.
Si Jojo Mante nga mihipos og 18 puntos maoy nangulo sa Black, samtang sa pilderong Blue gipangulohan ni Jimbo sa iyang 31 puntos.
Sa laing duwa, milampos usab ang Red Barako pagpukan sa White, 90-84 samtang ang Green Atan Guardo milampurnas sa Gold, 76-74.
Ang BAR 1st Fiesta KAP 2008 gipasiugdahan sa Basketball Association of Ramos (BAR) nga gipangulohan ni Felicisimo Salcido uban sa suporta sa Cogon Central-Ramos Barangay Council ubos sa liderato ni Brgy. Capt. Omar Durano.
BLUE (89) -- N. Jimbo 31, D. dela Peña 12, Ocaba 10, R. Esplanada 8, E. Abatayo 8, L. Villaver 8, N. Rosaldo 4, R. Regidor 4 D. Solon 2, J. Ypil 2
- Latest
- Trending
