3rd CDU Run gitakda sa Agosto 17

Ang unang school-based running event dinhi sa Sugbu, ang Cebu Doctor’s University Run, andam sa ilang ikatulong edisyon nga gikatakda karong Agosto 17 diha sa Mandaue reclamation area.

Kapin sa 5,000 ka fun runners, kasagaran niini gikan sa CDU ang moapil sa ginukdanay sa kadalanan.

Ang mga partisipante mosubay og bag-ong rota nga gihulagway ni race director Dr. Peter Mancao nga makiangayon nga rota ug haom sa tanan.

Gipasiugdahan sa Run For Sight Foundation uban sa pag-abag sa Sports and Fitness Enthusiasts ug sa Cebu Road Runner’s Club, ang lumba adunay tulo ka mga kategoriya -- 10K, 5K ug 3K Fun Run.

Ang top-three winners sa 10K run makadawat og ganting salapi, samtang special awards ang ihatag ngadto sa labing kusog nga CDU employee o tinun-an sa nahisgutang kategoriya.

Ang organizers nga gipangulohan sa father-and-son tandem Drs. Potenciano II ug Yong Larrazabal, mipahigayon ning maong kalihukan aron mamahimong aktibo ang ilang students organization ug sa samang higayon, raising funds alang niadtong mga kabus nga kaigsuonan.

Si CDU founder Dr. Potenciano Larrazabal II mibutyag nga ang nakita gikan sa unang duha ka edisyon sa tinuig nga lumba gigamit sa nagkalain-laing medicial missions ug ingon man rehabilitation projects atol sa oil spill didto sa isla sa Guimaras.

Ang registration sa 3rd CDU Run gisungdan na diha sa CDU campus ug sa Philippine Sports Commission (PSC)-7 office. Ang deadline sa pagpanglista hangtod lamang sa Agosto 15.