Labwan si Banal panama na Bazooka lup-og ni El Torito

“Filipinas I love you. I am strong. I am strong.” Mao kini ang unang mga pulong nga gilitok sa 25 anyos nga Panamanian nga si Rafael “El Torito” (Little Bull) Concepcion human niya tumbaha si AJ (Alex John) “Bazooka” Banal sa ilang championship fight alang sa WBA Interim superflyweight kaniadtong Domingo sa gabii didto sa Cebu Coliseum ubos sa boxing card nga Laban na Banal Panahon Na.

Miligid una si Concepcion didto sa luna ug kalit nga mibangon nga naghilak (tears of joy) ug dayon katkat sa pisi nga nagsiyagit sa tumang kalipay.

Wala’y bisan usang nagtuo nga mao kadto’y dangatan ni Banal ilabi na siya maoy nagkontrolar sa unang upat ka rounds diin nagsige na lang og panggakos ug sige og atras-atras si Concepcion.

Apan inay nga maluya, kalit lang nabalikan sa kalagsik si Concepcion pagsugod na sa ika-lima ka round ug siya na maoy agresibo kaayong mo-atake ni Banal. Nadakin-as si Banal ug napaluhod kadali ug sa misunod nga mga rounds, nataghapan gyud si Banal sa duha ka right hooks ni Concepcion sa may 2:35 sa ika-10 round. Ang referee nga si Raul Caiz, Jr. miduol sa nabungog nga Banal ug iya kining gi-iphan kutob sa 10 ug dihang milingo-lingo na si Banal, iya dayong gihunong ang away ug miduol kang Concepcion aron pagdeklarar nga siya na maoy kampiyon.

Si Concepcion gisaway sa mga Sugbo-anon tungod sa iyang hugaw nga taktika sa away ug tataw kaayo nga iyang nalupig sa palutsanay ug pamaagi ang 19 anyos nga Sugbo-anong boksidor gikan sa barangay Ermita, ning dakbayan.

Human sa away, mi-angkon si Banal nga mura siya og naluya niadtong awaya ug dili na makaya sa iyang lawas ang kakapoy. Mga eksperto sa boksing nagtuo nga si Banal nasubra-an sa iyang training apan sa umaabot, ilang gituohan nga mas kusgan nga Banal ang mosaka sa ring sa sunod pa niyang away. Si Banal kinsa nasugamak sa labing una niyang pilde sa 19 ka away sa ring sa bag-o niyang record nga 18-1 (16 KO’s) samtang si Concepcion aduna nay 10-2-1 nga record. Aduna lang siya’y unom ka knockouts sa iyang career.

Si Concepcion gikatakdang moaway sunod alang sa WBC superflyweight sa modaug tali kanila ni Nobuo Nashiro ug Kohei Kono nga pulos taga Japan.

Wala igsapayan ni Concepcion ang 30 ka oras nga biyahe gikan sa Panama padung nganhi sa Pilipinas lakip sa Sugbo. Nalangay siya’g duha ka oras didto sa Brazil una pa nakakuha’g flight padung sa Manila.

Gibiyaan ni Concepcion ang iyang anak nga napulo pa lang ka buwan aron lang makig-away ni Banal ug iyang gipahinungod ang iyang kadaugan ngadto sa iyang pamilya.

Ang wala damha nga kapildehan ni Banal dili hinuon susama kangil-ad sa kapildehan ni Rey “Boob’boom” Bautista kinsa nalukapa human sa usa lang ka round batok ni Juan Ponce de Leon sa Mexico atol sa boxing promotion nga Boxing World Cup “Philippines vs. Mexico”.