Liboan na kapin ka mga partisipante ang nagparehistro sa 32nd Milo Marathon nga mosikad karong Agosto 3 dinhi sa Sugbu.
Ang gibahin sa tulo ka kategoriya -- ang 3k Kiddies (boys and girls) nagpangedaron gikan sa sayes hangtod sa 12-anyos, 5k Fun Run (Open) ug ang 21k Provincial (Open) elimination race nga salmotan sa mga dekalibreng runners sa Sugbu ug sa mga kasikbit nga dakbayan sa rehiyon-7.
Ang modaog maoy ibala sa Sugbu alang sa 42.195k National Final Race nga ipahigayon didto sa kaulohan.
Gipaabot nga magubot na sab ang kadalanan atol unya sa maong lumba kay sama sa nangaging mga katuigan, moapil gihapon ang mga tinun-an sa elementarya, sekondarya ug kolehiyo gikan sa nagkadaiyang mga tunghaan dinhi sa Sugbu.
Gawas sa mga tropeyo, ang makampiyon sa Kiddies Run mobulsa og P1,500, ang 5k Fun Run makadawat og P2,500 ug ang mohari sa 21k Provincial Race gantihan og P10,000.
Ang tanang partisipante ning tinuig nga Milo Marathon makadawat og sertipiko.
Nagpadayon pa gihapon ang registration diha sa Cebu City Sports Complex.
Ang registration fee nagkantidad og P30 alang sa 3K Kiddies Run, P40 sa 5K run ug P100 alang sa 21K Marathon libre na niini ang T-shirt ug Milo cap.
Alang sa dugang mga kasayoran mahimong motawag ni Mr. Ricky Ballesteros sa numero 254-8567.