Milusad og rally ang Southwestern University (SWU) Cobras sa fourth quarter aron pagkulit og 105-93 nga kadaugan batok sa Han Yang University sa South Korea ug ingon man pag-angkon sa ikatulong dapit sa Asian University Basketball Championship (AUBC) Battle of Champions kagabii sa Cebu Coliseum.
Luya kaayo ang Cobras ug daginuton kaayo ang ilang iskor nga naghatag sa Hang Yang og higayon pagbingat sa ilang labaw, 82-63 sa third quarter. Hinuon, sa fourth quarter, ang SWU mikisikisi ug gihigpitan og guwardiya ang ilang ball handlers sa Korea.
Ang Cobras mibagdok og 22-0 run sa katapusang kuwarter aron pag-ilog sa labaw sa labing unang higayon, 85-83 human sa basket ni Alfred Belande.
Gikan niadto nagtusaktusak na ang mga puntos sa Cobras ug wala na makabawi pa ang bisitang Han Yang hinungdan sa ilang kapildihan.
Si Eric Zanoria mipabuto og 38 puntos aron pangulohan ang Cobras, samtang si Belande miabuno og 21 puntos.
Sila si Kim Woo Kyun ug Song Chang Yong maoy nag-una sa tanang scorers nga pulos mibugha og 21 puntos, samtang si Lee Sang II miligwat og 15 puntos.
Sa laing bahin, si Basketball Association of the Philippines-Samahang Basketbol ng Pilipinas (BAP-SBP) President Prospero ‘Butch’ Pichay Jr., kinsa nakaabot sa championship game tali sa UV ug China, maoy mihatag sa mga tropeyo ngadto sa Cobras ug Han Yang.
Ang UV Lancers nakiggubat pa sa Huaquiao University sa China alang sa kampiyonato.
PUNTOS MATAG USA
SWU (105) -- Zanoria 38, Belande 21, Armecin 10, Pacquaio 8, Poligrates 7, Diango 7, Nuñez 4, Divinagracia 4, Litorja 4, Jalandoni 2
Han Yang (93) -- Song 21, Kim 21, Lee 15, Lee 12, Lee 11, Song 3, Gin 2