Cebu delegation nagpanikad

Luwas ug walay kakulian ang pag-abot sa delegasyon sa dakbayan sa Sugbu didto sa San Francisco, California ug  nagpanikad  na kini  alang sa 42nd International Children’s Game.

Ang maong delegasyon nga gipadala ni Greater Cebu Sports Organizing Committee (GCSOC) ni sportsman Jonathan ‘Atan’ Guardo gilangkuban og  mga magduduwa sa  lawn tennis  ug  table tennis.

Sila mao ang managsuong Jessica ug Jacob Lagman, Ariel Jay Torion, Jean Phillippe Jawad Honoridez ug Dannel Jay  Tormis sa University of Cebu (UC).

Giubanan sila ni Philippine Sports Commission executive director Fr. Vicente ‘Vic’ L. Uy, SVD ug PSC-7 coordinator Danilo Villadolid.

“I wish them the best of luck and hope they will bring home the bacon,”  matud pa ni Guardo.

Sa ilang pag-abot, ang mga Sugbuanon giabi-abi sa head of delegation Allan Torrevillas ug GCSOC vice chairman Eugenio Gabuya Jr. Mihatag sila og courtesy call ngadto ni Philippine consul general sa San Francisco Hon. Mariano A. Paynor Jr.

Matud pa ni Torrevillas, ang Sto. Niño de Cebu USA, Inc. pinaagi sa tabang nilang Hale Concon, Nancy Concon, Rudy Rodriguez, Rita Rodriguez ug Helen Bollozos maoy responsable sa paghan-ay sa akomodasyon sa mga atleta ug opisyales sa Sugbu. Ipahimutang sila sa University of San Francisco gikan sa Hulyo 10-15.

Ang ICG usa ka panagtapok alang sa selebrasyon sa friendship ug sport diin 1,500 ka batan-ong mga atleta gikan sa 100 ka siyudad nga morepresentar sa 50 ka mga nasud ug unom ka continents ang mopakita’g aksiyon sa usa ka semana nga sports conclave.

Natukod niadtong 1968 ni  Slovenian professor Metod Klemenc aron pag-promote sa kalinaw ug sa panaghigalaay  pinaagi sa paugnat sa kusog, ang International Children’s Games  nagtubo ngadto  pagka  global competition ug cultural festival.

Ang ICG ang labing daku nga multi-sports international youth games giila  karon sa International Olympic Committee .