AUBC sugdan karon

Sugdan na sa University of the Visayas (UV) Green Lancers ug Southwestern University (SWU) Cobras ang ilang kampanya  sa 6th Asian University Basketball Championship (AUBC) Battle of Champions nga buksan karong adlawa diha sa Cebu Coliseum.

Sa dili pa ang bakbakan  sud sa korte, adunay  pagahimuong  opening ceremony sa ala-1:00 sa hapon nga pagatambungan sa lokal ug langyaw’ng mga opisyales.

Ang UV Green Lancers ni coach Elmer ‘Boy’ Cabahug moharong sa Hang Yang University  (HYU) sa South Korea nga pangulohan ni Asian University Basketball Federation (AUBF) president Shin Dong Pa sa main game sa alas-5:00 sa hapon.

Ang HYU gilangkuban og mga batan-on ug mas tag-as nga mga players, apan seguradong dili sab pabentaha ang Lancers, ang labing tang-ang collegiate team dinhi sa Sugbu.

Sa milabay’ng lima ka edisyon sa AUBC, ang team ni Shin Dong Pa nidaog og duha ka titulo sa Myong Ji ug Sangmu. Ning higayon, apan  lahi karon ang koponan sa Korea, dili lang nakapabor sa gitas-on kondili lakip na sab sa talento ug kusog.Sa laing bahin, ang Chinese cagers gikan sa Huaquiao University giisip nga maoy moangkon sa titulo. Ilang sangkaon ang Angeles University  Foundation (AUF) sa Pampanga sa alas-3:30 sa hapon human sa opening game  sa alas-2:00 sa hapon tali sa SWU Cobras ug University of Luzon (UL) Golden Tigers.

 Sa laing bahin, ang Chinese team nga ania karon mao ang Huaquiao University nga usa sa  mga lig-ong  contender. Ilang ikasangka ang Angeles University Foundation sa ikaduhang duwa human magpinaksitay ang SWU Cobras batok sa University of Luzon Golden Tigers.

Biyahe paingon sa Hong Kong ang nagpaabot sa local team nga maghari sa usa ka semana nga kompetisyon.

Laing kalihukan nga ipahigayon panahon sa maong torneyo mao ang  basketball clinic nga dumalaon ni Shin Dong Pa unya sa Hulyo 11,  usa ka adlaw sa dili pa ang championship game.

Ang pagdala sa AUBC dinhi sa Sugbu usa ka proyekto ni Basketball Association of the Philippines (BAP) regional director Lorenzo ‘Chao’ Sy  uban sa abag ni CESAFI commissioner Felix O. Tiukinhoy  Jr., kinsa  mao sab ang commissioner sa AUBC.
Mga  opisyales sa BAP-SBP ang  mobisita sa Sugbu uban sa mga dinapit gikan sa  FIBA, AUBF ug FESSAP ang mosaksi sa opening ceremonies.

Sila mao si BAP-SBP chairman Congressman Luis Villafuerte, BAP-SBP president Prospero Pichay, Jr., FIBA President for Life Dr. Carl Menky Ching, AUBF vice-president Dr. Ekodjamitko Sukarso, BAP secretary-general Graham Lim, BAP-SBP executive director Christina Tan, BAP-SBP vice-chairman Wilson Young, BAP-SBP board member Mayor Rey Baula, BAP-SBP treasurer Tony Fabico, FESSAP president Teresita Abundo ug FESSAP vice-president Dr. Robert Milton Calo.

Makigduyog sila nilang Governor Gwen Garcia ug Cebu City Vice Mayor Michael Rama.

Matud pa ni Lim nga usa siya sa nagtabang ni Sy aron madala ang AUBC dinhi sa Sugbu sa labing unang higayon isip iyang pasalamat sa mga Sugbuanon nga mahiligon kaayo sa duwang basketbol. 

Ang  mga  major  sponsors sa maong torneyo mao ang mosunod; Burlington, Pepsi Cola, Nature’s spring, Hotel Fortuna, Casino Rubbing Alcohol, Omega Pain Killer ug the United Korean Community Association, Inc.

Lain pang nagpaluyo  mao ang Gaisano Main, Gaisano Country Mall, Waterfront Hotel, Fil-Chinese Chamber of Commerce, La Fortuna Bakery, University of the Visayas, Southwestern University, University of Cebu, Cebu City Sports Complex ug ang CESAFI.