Mandaue Jaycees 4-0 na

Ang Mandaue Jaycees ni Joey Cal mipahamtang og 22 puntos nga lubong ngadto sa dinaog-daog nga Purcia Transport sa iskor nga 94-72 aron pagposte sa ilang ikaupat nga sunod-sunod nga kadaugan sa nagpadayon nga Jaycees Basketball Association (JBA) President’s Cup 2008 didto sa City Sports Club-Cebu gym.

 Wala makasinati og kalisud ang Mandaue Jaycees ug ila na lang gipanalipdan ang ilang double digits nga labaw pagsugod sa katapusang kuwarter aron dili maka-rally ang Purcia Transport.
Si Ringo Balbuena mipabuto og 17 puntos, giabagan sab siya nilang Nestor Patindol, Ed Latonio, Edgar Colina ug Ritchie Garcia nga pulos nakatampo og double figures.

Daku unta'g nakuhang iskor si Niño Boniel nga adunay 25 puntos apan kawang ang maong paningkamot bisan pa man tuod og nagkumboya sila si Chito Hernandez ug Janjan Boniel og 25 puntos kay ang ilang kaubanan mi-iskor lang og labing daku kuwatro puntos.
Ang Mandaue Jaycees naghupot na karon og 4-0 nga baraha, samtang balit-ad ang baraha nga gihuptan sa Purcia nga 0-4.
Sa laing duwa, midaog sab ang RC Goldline-Alcatel human maka-eskapo gikan sa Landview Property sa iskor nga 66-65 aron pagpuwesto sa ikaduhang dapit.

Ang lay-up ni Dennis Que sa katapusang 12 segundos maoy nakapadaog sa Alcatel nga nagbitbit na karon og 4-1 nga baraha.

Nagtabla pa ang iskor, 58-all sa katapusang tres minutos apan naka-iskor si Dave Lim sa ilawom aron paghatag sa Alcatel og nipis nga labaw, 64-63 apan dali kining gitubag ni Pocholo Lao sa Landview aron pag-ilog og balik sa labaw, 65-64 sa wala pa makahigayon og lay-up si Que. Si Que mi-iskor og 26 puntos alang sa Alcatel.

Unang duwa:

Mandaue Jaycees (94) -- Balbuena 17, Patindol 14, Colina 13, Latonio 13, Garcia 10, Magallano 6, P. Garcia 6, Lerio 6, Ong 6, Toledo 3

Purcia Transport (72) -- N. Boniel 25, Hernadez 15, J. Boniel 10, Purcia 4, Jumawan 4, Lim 4, Monreal 4, Olivia 2, Cañares 2, Porras 2

Ikaduhang duwa:

RC Goldline-Alcatel (66) -- Que 26, Lim 16, Sulay 9, So 8, uy 4, ong 3

Landview Property (65) -- Lao 13, M. Hing 12, Gollon 12, Mk Hing 12, Go 7, Tan 5, D. Hing 2, Ang 2