Siso siblings nagmangtas

Padayon ang pagmangtas sa  managsuong Sally Mae ug Niño Siso sa ikatulong adlaw sa 13th Gullas Cup tennis tournament kagahapon didto sa Casino Español de Cebu tennis courts.

Wala kaayo makasugat og problema si Sally Mae diin yano ra kaayo kining mipalagpot ni Clarrisa Fuentes, 6-1, 6-1 aron pag-abante ngadto sa girls 18-under semifinals, samtang si Niño yano ra sab kaayong mipukan ni JP Alba pinaagi sa pag-iskor og  6-1, 6-0 aron sab pag-abante sa boys 18-under quarterfinals.

 Gawas ni Sally Mae, si Hanna Espinosa nakasulod sab sa sunod hugna human gipulbos si Jeremie Campo, 6-1, 6-1.

Sa boys division, laing upat ang mikuyog ni Niño sa last eight. Sila mao si Kennex Abadia, Princeton Gerapusco, Lowell Lloyd Cañete ug  Christian John Cabahug.

Si Abadia mikulit og 6-1, 6-3 nga kadaugan batok ni Andrew Batuto, samtang si  Cañete midispatsar ni Cyril Camporedondo,  6-3, 6-3.

Nakuha sab ni Cabahug ang makutas nga kadaugan pinaagi sa super tie-break, 6-4, 2-6, 10-8, samtang si Gerapusco yano kaayong miposte og  6-2, 6-1 nga kadaugan batok ni Jose Amando Lumenoque.

Didto sa Cebu Country Club, si Jacob Lagman mipakita sab sa iyang  kabangis pinaagi sa paglansang og 6-0, 6-0 nga kadaugan batok ni Janil Joy Pintor aron sa pag-abante sa boys 14-under final eight. Sunod niyang harungon mao si Angeloe Villarante alang sa lingkoranan sa final.

Lain pang quarterfinalists sa boys 14-under mao sila si Dan Cinco, Kim Ayuda, Fritz Satera, Francis Alcantara ug Benjo Garcia.

Si Vince Marc Tabotabo nakasulod sab sa quarterfinal, apan ubos sa 12-under category human gipilde si Carl Cathedral, 6-1, 6-0.

Uban ni Tabotabo sa sunod hugna mao sila si RJ Singson, Zathley Mae Alferez, Charles Kinaadman, Ranz Gerona, Germaine Laurel, Christopher Incarnacion, Jan Godfrey Seno ug Jason Lauron.