Largo missakmit boys 18-under title

Gibuntog  ni  2008 Palarong Pambansa gold medalist Francis Largo  si Kennex Abadia pinaagi sa tie-breaker sa ilang engkuwentro sa final aron pagsakmit sa boys 18-under title sa 2008 Milo Age-Group Tennis Championships-Cebu leg kagahapon didto sa Villa Aurora tennis courts sa barangay Mabolo, ning siyudad.

Nakasulod si Largo sa final human sa iyang 8-4 nga kadaugan batok ni Amiel Aya-ay, samtang si Abadia miangkon sa katapusang lingkoranan sa final human gipalagpot si Princeton Gerapusco, 8-5.

Sa pinaksitay sa final, si Largo nasugamak sa first set, 1-6, apan mibawos kini sa second set, 6-1 aron pagpuwersa ngadto sa rubbermatch. Sa ikatulong set, wala na mohatag og gamay’ng kompiyansiya si Largo ngadto ni Abadia aron pag-angkon sa 10-4 nga kadaugan.

Laing Sugbuanon nga si Christian John Cabahug mipakita sab og maayong labok dihang iyang giharos si Jayvee Canoy, 6-1, 6-1 aron pag-angkon sa boys 16-under title.

Si Christian John nakaangkon og luna sa final human gipilde si Amiel Aya-ay sa semis, 8-7, samtang si Canoy nakakuha sab og luna sa finals pinaagi sa pagpukan ni top ranked Princeton Gerapusco, 8-5.

Sa laing bahin, sila si Largo ug Cabahug ug ubang mga magduduwa mopakita sab og aksiyon sa Prince Age-Group nga mosikad karong adlawa diha sa Cebu Country Club.