Agusto milangkat sa championship trophy

Nabulahan ang dakbayan sa Lapu-Lapu pag-host niini sa 1st Kadaugan sa Mactan 9-Ball Championship gumikan kay ang garbo niining si Boots Agusto maoy misakmit sa kampiyonato sa maong upat ka adlaw nga torneyo niadtong Domingo sa gabii didto sa Rhodiet Billiards Hall.

Si Agusto nga mipalandong poder sa Magi Stable, mipukan ni Demosthenes 'PlongPlong' Pulpul sa Cagayan de Oro City, 9-5 aron pagbulsa sa P50,000 nga ganti. Mao kadto ang kinadak-ang premyo nga iyang nadawat sa iyang career.

Maayo kaayo ang gipakitang diskarte sa 19-anyos nga taga Sitio Latag sa Barangay Maribago gumikan kay wala na niya pabangona pa ang iyang kontra human mi-abante, 2-0.

Igo lamang nakatabla si Pulpul sa iskor nga 5-5 gumikan kay gipakyaw man og daog ni Agusto ang nahabiling upat ka racks nga gikalipay og maayo sa iyang mga dumadapig.

Hinuon wala magmahay si Pulpul gumikan kay mibitbit man siya og P20,000.

"Suwerte lang sab gyud seguro ko kay nipabor man nako ang katag sa bola," matud pa ni Agusto. "Wa gyud ko magdahom nga ma-champion kay sa first round pa lang, pirme na gyud ko hapit mapilde."

Malisud nga dalan ang gibaktas ni Agusto sa wala pa siya makasud sa ganghaan sa finals. Pulos siya nakaipsot lang og uno punto batok nilang Charlon Alcidera, Dave Pamulagan ug Burt Gutobat nga iyang gipangpilde sa managsamang iskor, 7-6.

Sa engkuwentro alang sa ikatulong dapit, nag-unay silang Edgardo Villarin ug Gutobat nga pulos stablemate ni Agusto. Si Gutobat maoy mipatigbabaw, 7-5, aron pagbira og P10,000. Si Villarin nakadawat og P5,000.

Sila si konsehal Rodolfo 'Kons' Potot ug Junard 'Ahong' Chan maoy nangunay og tunol sa mga ganti ngadto sa mga mananaog.

"Lipay kaayo ko nga successful ang atong tournament. Tungod sab ni sa mga players nga bisa'g gikan sila sa lagyo nga dapit nanganhi gyud sila aron mo-apil," matud pa ni Kons Potot, ang nagpasiugda sa maong torneyo ug mao sab ang tag-iya sa Rhodiet Billiards Hall.

"Himuon na man ni natong kada tuig nga tournament ug nanghinaot ko nga mas daghan ang nangapil next year," dugang pa ni Konsehal Potot.