Pepo Rubi nanghawod sa 10th Ornopia Cup

Gisakmit ni Pepo Rubi sa Castrol-Quickflight Racing Team ang kadaugan sa 10th Ornopia Cup nga magsilbe sab nga third leg sa 2008 MS Motosuit Motocross Series niadtong Domingo didto sa Calambua, San Remigio sa amihanang bahin sa lalawigan sa Sugbu.

Sa ikatulong higayon, ang lumba sa tanang dibisyon gipamub-an tungod sa dili luwas nga racetrack. Labaw’ng mahinungdanon, ang event organizer nga si Lou Ornopia ug ang technical committee dili sab buot nga marisgo ang mga riders.

Si Rubi mipabuhagay sa tanan niyang kusog sa mga agianan nga dili na lapukon. Ang iyang kaisog ug kamapangahason maoy nagduso kaniya aron paghari  sa experts division.

Mi-okupar sa ikaduhang dapit mao si reigning MS Motosuit “Rider of the Year” Juvanni Abellar ug gisundan ni Paul Inoc alang sa ikatulo.

Ang kadaugan ni Rubi maoy ikaduha sa tulo ka legs human siya midaog sa inaugural offering didto sa Liloan.

Doble ang naaning kalipay ni Rubi gumikan kay ang iyang teammates sa Castrol nanghawod sab sa ilang tagsa-tagsa ka dibisyon nga gipangulohan ni Bonnie Bustillo, kinsa milangkat og  duha ka titulo pinaagi sa pagdaog sa 125  local enduro ug sa novice open production.

Napuhalan ni Bustillo si Donkey Sanchez alang sa taas nga puwesto sa 125 local enduro diin si Inoc mitapos sa ikatulo.  Ang ikaduha ug ikatulo nga dapit sa novice open production naangkon nilang Ayen Ledesma ug Sanchez.

Si Keith Babano Galaura nakatampo sab sa himayaong adlaw sa Castrol-Quickflight Racing Team human kini mitapos sa ikaduha sa mini class division, samtang ang father-and-son tandem nilang Emmanuel ug Klark Wagas mitapos sa ikatulo sa executive B ug intermediate open divisions.

Si Seigfred Ornopia sa Keiz BJ Motor Sales nga nagsaulog sa iyang adlaw’ng natawhan kagahapon, mipupo og duha ka runner-ups. Si Ornopia mipahiluna sa ikaduha sunod ni Tata Omoli kinsa midonar sa executive B ug ikaduha sab  ngadto ni Nonoy Reluya sa executive A.

Sa laing bahin, si Paulo Inoc mao sab ang naghari sa intermediate class batok nilang Rex Barbaso ug Clark Wagas, samtang ang executive C gidominar ni Julius Santillan uban nilang Alex Arevalo ug Tata Omulo  mi-okupar sa ikaduha ug ikatulo nga dapit.

Si Ayen Ledesma maoy nanghawod sa novice open enduro, gisundan nilang Ryan Querol ug Sanchez, samtang si Normal Pautan maoy naghari sa beginner’s open production human gipilde silang Querol ug Jon-Jon Flores.

Sa iyang bahin, si Glenn ‘D King’ Aguilar,  nakakuha og daghang pagdayeg gikan sa fans ug ingon man sa riders dihang miapil kini sa tigiay sa special pro class bisan og dakung risgo sa iyang career.

Giangkon ni Aguilar ang labing taas nga puwesto batok nilang Juvanni Abellar  sa Power Sports Racing ug Inoc.

Nagmalampuson ang maong kalihukan luyo sa pagsuporta sa Castrol Power 1, Imarflex Battery Manufacturing, Reliance, Andy Uy, Keiz BJ Motorsales, Norkis Trading Corporation, F&FO Motorparts,  Cebu Progress Manufacturing, CEVETCO, LJ Marble and Construction Supply, Engr. Joy Flores, RMO Motorsales, MS Digital Prints, ug 888 Muffler Tech Header Core.  (Uban ni Caecent No-ot)