Sambag I Summer League sugdan na

Mosikad na karong adlawa ang gikahinaman nga 2008 Barangay Sambag I Summer League  diin dul-an sa 1,000 ka atleta gikan sa 54 ka teams ang mag-abot diha sa sports complex sa nahisgutang barangay.

Ang nabantog nga sports patron nga si Jonathan ‘Atan’ Guardo ug iyang manghod nga si Sambag I Barangay Captain Jerry Guardo maoy mangu sa mga pinasidunggang dinapit ug mamumulong sa grand opening  nga sugdan pinaagi sa parada sa mga partisipanteng koponan sa alas-3:00 sa hapon.

Lahi sa nangaging katuigan diin ang tinuig nga kalihukan mitutok lang sa basketball, ning tuiga adunay duha ka sporting events ang gipuno ug kini mao ang badminton ug women’s volleyball.

Ang basketball gibuak ngadto sa upat ka kategoriya -ang mini (12 years old and below), midget (17-under), juniors (18-34 years old) ug ang seniors (35-above).

Sa volleyball, ang matag team gitugotan nga makakuha og usa ka “bading” isip reinforcement, samtang ang badminton adunay tulo ka kategoriya, men’s, women’s ug mixed doubles.

Matag team sa badminton kinahanglan adunay unom ka magduduwa, tulo ka lalaki ug tulo sab ka babaye sa matag dibisyon.

Kapin sa P50,000 nga ganting salapi ang gi-andam alang sa top performing teams sa tanang events  ning duha ka buwan nga kompetisyon.

Ang kampiyon mobulsa og P5,000, ang ikaduha modawat og P3,000 ug ang ikatulo makadala og P2,000.

Matud pa ni Guardo nga adunay ipanghatag nga freebies atol sa opening kortesiya sa Heartvit, usa sa iladong food supplements nga gigama sa Uniherb Philippines.