Niining bahina ning atong lindog, tugoti nga hatagan nato'g agianan ang usa ka text message nga naggikan sa usa sa mga suki natong magbabasa. Importante sab kaayong mahatagan og pagtagad kining iyang pakisayod, dili lamang aron iyang masayran, kondili aron masayran usab sa tanan.
Ang iyang text nagkanayon: "Good day, Sir. Puwede po ba magtanong? Puwede po ba malaman kung papaano maglaro at ano ang rules ng 15-Ball? Maraming salamat po. I'm Daniel D. Badrina of Ormoc City." -- 0919-4694724
Daghang salamat usab sa imong text. Hinaot nga dili ka pul-an sa pagsunod kanunay niining lindog mahitungod sa billiard sport.
Sa pagdula og 15-Ball, ang general rules sa pocket billiards gigamit gihapon niini. Sa ato pa, wala kini kalainan sa ubang variation sa dulang bilyar. Misagop gihapon kini sa batakang mga lagda sa pocket billiards. Ang wala lang sagopa niini mao ang mga lagda sa pocket billiards nga mosukwahi sa additional rules nga gipatuman niining maong variation sa dula.
Sumala sa librong Billiards: The Official Rules and Records Book, "Fifteen ball is a basic game variation that does not require calling balls or pockets, and yet rewards good shot selection because scoring is based on the numerical values of the balls (numbers) as in rotation."
Kining maong matang sa dula maayo alang niadtong mga magtutuon ug bisan sa mga beterano na sa dula. Sagad kining dulaon sa duha lang ka magdudula. Apan puyde usab nga mokapin sa tulo o duha ka magdudula ang magdula niini.
Object of the game: To score balls of greater total point value than the opponent. Wala gihapoy kalainan sa ubang variation sa dula, dili ba?
Ang labing taas nga score nga maoy kahumanan sa dula mao ang 61. Kun ugaling may duha o labaw pa niini ka daghan nga mga magdudula nga magtabla sa kinatas-an nga score unya nahurot na ang object ball sa ibabaw sa lamesa, ang magdudula nga maoy nagpasulod ngadto sa pocket sa katapusang object ball maoy mahatagan og kredito sa dula.
Ang object ball nga illegal nga napasulod sa pocket ibutang sa spotting area sa lamesa. Walay ipahamtang nga penalty. Kun ang object ball molukso ug mahulog gikan sa lamesa, ibutang usab kini sa spotting area sa lamesa ug wala gihapoy ipahamtang nga penalty. Sa higayon nga nakahimo og foul ang usa ka magdudula, kuhaan og tres puntos ang iyang score.
Mao nga sa pagdula niining matanga sa variation sa billiards, kinahanglang likayan sa magdudula ang paghimo'g daghang foul kay nagkahulogan man kini sa paghiyos sa iyang score.
* * *
(Mga sugyot ug pakisayod? Text sa 0910-8105522)