PCGS clinic sugdan Abril 2

Estelo sa Serbian basketball maoy usa sa itudlo ni coach Tata Merced ngadto sa mga gustong mosalmot sa Philippine Christian Gospel School (PCGS) Basketball Summer Camp alang sa mga estudyante sa high school nga sugdan sa Abril 2 diha sa PCGS gym.

Si Merced kinsa maoy coach sa Asian College of Technology (ACT), mibutyag nga ang unang batch sa levels 1-2 sugdan Abril 2 hangtod na ngadto sa Abril 28 gikan sa Lunes hangtod Biyernes sa 3-5 sa hapon.  Ang second batch mosunod dayon sa Abril 29 ngadto na sa Mayo 23 apan ang kadtong una nang nakapa-enroll mahimo gihapon mopadayon sa ilang training.  Lain sab ang training alang sa mga nagtungha sa elementarya nga gikan sa 7-9 sa buntag Lunes hangtod Biyernes sab gihapon.

Si Merced usa sab ka sakop sa ML Kwarta Padala in the commercial league.  Matod  pa niya nga apil sa iyang itudlo mao ang estelo ni Serbian coach Vladi Djurovic kinsa mihimo’g coaching seminar didto sa Manila sa miaging tuig ug gitambongan sa mga coaches gikan sa lain-laing lugar sa nasud.  Kinsa kadtong gusto motambong mahimong moderetso didto sa PCGS business office aron mo-fill up ug porma.

Mahimo sab silang mokontak ni coach Merced sa iyang mobile phone sa numero. 0926-3991905.