Lite Trading daug batok 100 Plus, 82-62

Miratsada ang Cebu Lite Trading pagsugod sa third quarter aron ilampurnas ang 100 Plus Isotonic Drink sa iskor, 82-62 sa una nilang duwa sa Vic Enterprises Invitational Cup kagahapon didto sa CEC gym.

Gikan sa 40-32 nga labaw sa halftime, kalit lang mipabuhagay og 10-2 nga rally ang Lite Trading pagbukas sa third period aron sa pag-inat sa labaw ug dayon gitiwasan nila ang ilang ka-atbang pinaagi sa paghimo’g 28-8 nga rally aron taposon ang third period sa iskor, 68-40.  Naglisod na’g tangtang sa higot ang 100 Plus tungod sa depensa sa Lite Trading pinangulohan sa 6-5 nga sentro Elmer dela Cruz nga kanhi magduduwa sa SWU Cobra ug ang beteranong point guard nga si Lito Navarro nga kanhi nagduwa sa CPC Navigators.

Ang Lite Trading wala na gyud hi-apsi gikan sa pagbukas sa fourth quarter ug malipayon  kaayong nagtan-aw sa iyang mga batos si playing coach Boy Te tungod sa gipakitang lihok subay sa ilang game plan.

Wala gani mogamit si Te bisa’g usa ka timeout sa third quarter tungod kay iyang nakita nga misaler ang ilang opensa dili susama sa 100 Plus nga nagkapuliki og panagang sa ilang mga tirada.

Ang tanang mga players nga gipasulod ni coach Te pulos gydu mi-iskor pinangulohan ni Jared Magdales kinsa mihakot og 15 puntos samtang si Jimbo Noel midugang og 10 puntos. 

Apan bisan pa sa ilang malamposong debut, dili pa angayan mag-saulog si coach Te tungod kay iyang hipanglantawan nga mag-agi una sila og pito ka bukid aron pag-pakgang sa mas tag-as nga Ave Maria ni USJ-R Jaguars coach Edito Salacut nga maoy paborito alang sa korona.

Ang Ave Maria mosuway og kuha’g 2-0 nga baraha dihang ilang gikasangka ang Cyber Rasta sa may 10 sa buntag apan wala pa hibaw-i ang resulta ning pagsuwat.

Puntos kada usa:

Lite Trading (82) —  Magdales 15, Noel 10, F. Te 8, Navarro 7, Dela Cruz 6, Mauro 6, Ocampo 6, Reys 6, Seno 4, Esma 4, Labilles 4, Sasing 3

100 Plus (62) — Luces 13, Roble 12, Maranga 11, Mendoza 9, Catibod 8, Estorba 6, Elizondo 2, Nadera 1 Halftime: 40-32.