Surban hari sa Magsaysay bike festival

Misidlak ang bitoon ni Niño Surban human kini midaog sa 5th President Ramon Magsaysay Mountainbike Challenge niadtong miaging adlaw didto sa Mt. Manunggal.

Si Surban kinsa gipaluyohan sa Danaotel ug sa Danao City Sports Commission wala makasinati og kalisud sa maong lumba ug iyang gihatagan ang iyang mga maghahagit og maayong leksiyon sa mountainbiking.

Naangkon ni Surban ang taas nga puwesto human niya gipukan ang mga bag-o nga sila si Eusebio Rabanes ug Loren Codero.

Sa junior-senior division, ang dili kaayo notadong si Michael Tabasa maoy miangkon sa kinatas-ang dapit human niya mapukan sila si Allan Sanchez ug Julius Diez, kinsa mi-okupar sa ilang ikaduha ug ikatulo nga dapit.

Sa veterans class, si Jonas Pontica mao usab ang mipatigbabaw, gisundan ni Joseph Almenia nga mipuwesto sa ikaduha ug Josh Endurina alang sa ikatulo, samtang si Java Melencio mao usab ang naghari sa masters class human niya mapulahi ang dinasonan nga si Ben Fabroa ug kanhi Tour ng Pilipinas champion nga si Rolando Pagnanawon.

Si Roman Fernandez mao sab ang labing maayong riders sa beginners class ning maong kalihukan nga gipasiugdahan sa Wizards Organization uban usab sa pagbulig ni Balamban Vice Mayor Ace Binghay. (Yoyo R. Abayan)