Dasian misakmit og titulo

Si Elma Dasian  sa Naga City milangkat sa unang titulo sa  2008 Prince All-Students Tennis Tournament didto sa Alta Vista Golf and Country Club tennis courts.

Hinuon, ang maong kadaugan wala niya makuha sa sayon nga paagi kay milabang  pa kini og tunokon nga dalan una niya mapalubog si Mary Joy Calapre sa Maasin, 8-6 aron pagdaog sa korona sa elementary girls’ division.

Sa laing mga duwa, ang topseed sa torneyo nga si Francis Largo yano kaayong mikulit og daog pinaagi sa paglubong ni Paulo Cenabre sa Don Bosco, 8-1, samtang ang second-ranked nga si Larry Antigua susama sab og naangkon nga kadaugan human gibugbog si Gerald Lambayan, 8-1.

Sila si Largo ug Antigua magkuyog sa sunod nga hugna  uban sa laing title favorite Bernardine ‘Niño’ Siso, kinsa mipukan ni Jess Anthony Espinosa, 8-2.

Sila si Cyril  Camporedondo sa University of the Visayas (UV) ug Israel Abarquez  mipakita sab og maayong performance aron pag-abante sa round of 16.

Ang mauswagong si Camporedondo  midispatsar ni Christian Paul Cabahug, 8-3, samtang si Abarquez gilisud-lisud pa una niya maangkon ang 8-6 nga kadaugan batok ni Joseph Tallo.