Donaire desididong panoorin ang kapatid

Patungo sa panonooring non-title fight ng kanyang kapatid na si Glenn sa Reno, Nevada, nagkaroon ng maliit na aksidente si world flyweight champion Nonito “The Filipino Flash” Donaire, Jr. kasama ang kanyang kasintahang taekwondo jin na si Rachel.

Ayon sa 24-anyos na si Donaire, isang bloke ng yelo sa madulas na kalsada sa San Leandro, California ang bumutas sa gulong ng kanyang kotse na minamaneho ng pinsan niyang si Brian Jugarap.

“I was not paying attention to the driving of my cousin as I was busy playing a video game with Rachel on the back seat,” ani Donaire. “Suddenly there was a loud pop on the tire and before we knew it we were skidding across the road towards the guard rail.”

Sa kabila nito, ipinagpatuloy pa rin ng grupo ni Donaire, ang kasalukuyang flyweight champion ng International Boxing Federation (IBF) at International Boxing Organization (IBO), ang biyahe patungo sa Reno, Nevada.

“We simply slowed down until we passed the icy road and everything was cool after that,” dagdag ni Donaire, magdedepensa ng kanyang IBF at IBO belts kontra kay Lebanese challenger Hussein Hussein sa Abril 18 sa Dubai, United Arab Emirates. 

Maganda naman ang naging kapalit ng aksidente matapos umiskor si Glenn ng isang unanimous decision, 79-73, 77-75 at 77-75, kay Brazilian Olympian Jose Albuquerque sa kanilang six-round bout.

Itinaas ng tinaguriang “The Filipino Bomber”, huling tumuntong sa boxing ring noong Oktubre ng 2006 kung saan siya tinalo ni dating IBF at IBO flyweight king Vic Darchinyan, ang kanyang win-loss-draw ring record sa 17- 3-1 (9 K0s).  

Sa kanyang panalo kay Albuquerque, ang paghahamon kay IBF super flyweight Ulises Solis ang susunod na hakbang ng kampo ni Glenn. (RCadayona)