Gituohan nga dili molungtad sa gikatakdang 12 ka hugna ang “rematch” tali sa Pinoy’ng si Manny ‘Pacman’ Pacquiao ug sa Mehikanong si Juan Manuel ‘Dinamita’ Marquez.
Ang notadong American trainer nga si Freddie Roach mibatbat nga si Pacquiao naghuna-huna nga mopatikangkang ni Marquez sa gikahinaman nilang “rematch” nga maoy main event sa “Unfinished Business” card karong Marso 15 (petsa 16 sa RP) didto sa Mandalay Bay Resort and Casino sa Las Vegas, Nevada.
“We are going for the knockout. We have all intentions of knocking him out. After Manny’s last two fights, we need to fight a great fight. We are moving up in weight and going for those titles after this fight,” matud pa ni Roach ngadto ni Brad Cooney sa boxingtalk.com.
Matud pa ni Roach nga si Pacquiao wala nay pagkulang pa ug determinado kining mopukan ni Marquez dili sama sa nahitabo atol sa ilang unang engkuwentro.
Atol sa ilang unang sangka niadtong Mayo 2004, gitumba ni Pacquiao si Marquez sa makatulo ka higayon sud sa unang round, apan ang Mehikano nakabangon ug iya pa nga napatabla ang away.
Sa laing bahin, si Roach mitug-an nga hugot karon ang pagpangandam ni Pacquiao alang sa iyang away batok ni Marquez.
“We have 4 weeks to go, and he’s looking very good. We had 9 rounds of sparring on Saturday, and we used 3 sparring partners. I have a strong guy to press Manny, I got a counter puncher, and I got a guy that will run, all to give Manny different looks. We know the keys to victory, and we’ll show you what they are on fight night,” dugang pa ni Roach. (Yoyo R. Abayan)