Gi-usban sa Sta. Lucia Realty ang defending champion Purefoods Hotdogs kagabii pinaagi sa pag-iskor og 112-101 sa Game 2 sa ilang best-of-seven championship series alang sa korona sa Smart PBA Philippine Cup didto sa Araneta Coliseum.
Ang Realtors nagtinguha sa ilang ikatulo nga daug sa Miyerkules sa Game 3 apan ang Purefoods hayan dili motugot nga 0-3 maoy mahitabo kanila.
Miratsada ang Realtors sa third quarter ubos sa pagtimon ni Kelly Williams kinsa maoy nangu sa Realtors sa iyang 23 puntos uban sa 11 ka rebounds. Nakapasulod sab siya’y 8 of 13 sa free throws. Mao kadto’y ika-18 nga double-double ni Williams karon nga season.
Si Kerby Raymundo kinsa na-fouled out sa naghinapos na ang fourth quarters, m-iskor ug 22 puntos ug mihakot ug walo ka rebounds alang sa Purefoods.
Nagsugod og kontrolar ang Realtors sa duwa human molabaw ang Purefoods og upat ka puntos, 68-64 pinaagi sa unom ka sagunson nga puntos ni Peter Jun Simon apan dihang na-ilog ni Williams ang labaw pinaagi sa iyang three-point play, 81-80, wala na molurang ang kabangis sa Realtors ug dako usab ug natabang sila si Ninja Joseph Yeo, Nelbert Omolon ug Dennis Miranda.