Ang walay pildeng USJ-R-Bibbo Hotdogs ug ang second-seeded UC/ASPAC Bank moharong sa ilang tagsa-tagsa ka kaatbang sa Reinforced CESAFI Partner's Cup "best-of-three" semifinals karong gabii didto sa Mandaue City and Cultural Center.
Ang USJ-R/Bibbo Hotdog kinsa miharos og daog sa double round eliminations bitbit ang 8-0 win-loss record, makigsangka sa CIT/Metro Gaisano sa main game nga gikatakda sa alas 8:30 sa gabii human sa duwa tali sa UC/Aspac Bank ug sa DBTC/Unilab-Alaxan.
Mobahog sa USJ-R\Bibbo Hotdogs mao sila si Lyndon Gudez, Armand Ponce, Bobby Hatague, Jessmar Villahermosa, Manny Gabas ug Ranulfo Malinao, samtang ang CIT/Metro Gaisano magsalig sa abilidad ni ex-pro Gilbert Demape ug Jerry Jaca nga maoy nakasalbar sa pag-abante sa semifinals.
Sa laing bahin, ipakita na sab sa higanteng 6'8 Jun Mar ang iyang katakus aron iyang mahatod ang iyang koponang UC/Aspac Bank ngadto sa finals.