Lapu-Lapu Chiefs nanghasi sa Cebu City Niños

Bisan pa sa taas nila nga pagbakasyon sukad niadtong Pasko, ang Lapu-Lapu Chiefs wala gihapon malumoti'g taya ug mas hait pa kini sa kampilan ni Lapu-Lapu dihang ilang gipukan ang host Cebu City Niños sa iskor nga 91-87 sa pagbalik sa Inter-City basketball tournament niadtong Biyernes sa gabii didto sa Poblacion, Pardo, gym.

Bisan pa man sa ilang pagkolapso sa fourth period, napugngan lang gihapon sa Chiefs ang dakung rally sa Niños tungod kay mas consistent man sila sa free throws, mas abtik ug hugot ang ilang depensa.
Tungod sa ilang kainit,  ang Chiefs milabaw og 18 puntos sa third period, 63-45 sa nahabiling singko minutos sa  maong kuwarter.

Apan takulahaw lang misikit ang Niños sa naghinapos nga bahin sa fourth quarter  luyo sa rally nga gipasiugdahan ni Richard Tabolong aron mabuhi pag-usab ang ilang paglaum sa iskor nga 83-85 human sa duha ka free throws ni Butong Villanueva nga may kapin pa sa usa ka minuto ang nahabiling oras sa duwa. Apan wala magpadala sa presyur ang Chiefs ug ila hinuon gitukmod palayo ang Niños aron maangkon ang kadaugan.

Si Jarjar Degamo maoy nangu sa Chiefs sa iyang 25 puntos, samtang si Adonis Morata mitampo og 20 puntos, 15 niini  gikan sa second period.

Ang Chiefs mao gihapon ang lider sa torneyo sa ilang 5-1 nga baraha. Ang Niños kinsa wala gihapon makatilaw og daog sa lima ka duwa gipangulohan ni Allen Abayata nga mihipos og 15 puntos.

Puntos Matag Usa

Lapu-Lapu (91) -- Degamo 25, Morata 20, Amores 13, Falcon 9, Amistad 7, M. Pancho 7, Berido 6, Asoro 2, Baguio 2
Cebu City (87) -- Abayata 15, Potencioso 12, R. Maraño 11, Villanueva 9, Abellanosa 9, Cabo 7, Tabolong 7, Gabuya 3, L. Maraño 3.