Carbonera misidlak sa Hilongos

Napuhalan ni Randy Carbonera  ang mas hanas pa kaniya nga si  Robert Villaver aron paghari sa 3rd Pedal Power 3's road race didto sa bag-ong municipal hall sa Hilongos.

Sila si Carbonera, Villaver, uban sa mapangahasong si Albert Basirgo ug lain pang rider nahapay gikan sa pundok sa sayong bahin sa 144-kilometer individual road race.

Apan naabtan sa demalas ang  ikaupat nga rider dihang mihiyos ang  ligid sa iyang biseklita hinungdan nga nabiyaan kini sa tulo ka mga Sugbuanon nga anaa sa kinaunhan.

Nimenor si Basirgo atol sa tungason nga dalan gikan sa Baybay paingon ngadto sa Sogod ug niadtong higayona nag one-on-one sila si Carbonera ug Villaver.

Nakahigayon si Carbonera sa katapusang 250 metros aron pagpukan ni Villaver, samtang si Basirgo naabtan pa og pipila ka minutos una pa nakalabang sa finish line aron pagpahiluna sa ikatulong dapit.

Sa veteran's class, si Orlando Toring mipukan sab sa early favorite Rolando Pagnanawon  aron pagdaog sa kinatas-ang dapit, samtang ang taga-Maasin nga Victor Claveria maoy nakaangkon sa ikatulo nga dapit.

Ang Cebuano riders nitapos og 1-2-3 aron pagdominar sa beginner's class pinaagi nilang John Pagnanawon, Elmer Navarro ug Janno Canasa.

Sa mountainbike event, nga usa ka criterium race libot sa Hilongos proper, ang Zarate siblings nga sila si Ryan ug Randy miangkon sa 1-2 spot sa beginner's class diin si Rogelio Suwaybaguio  mipahiluna sa ikatulo.

Si Emie Gopo-od Matalom maoy naghari sa masters' division uban nilang Gilly Zarate ug Nicanor Comida sa Tacloban nga mipuwesto sa ikaduha ug ikatulo nga dapit.

Sa laing bahin, ang garbo sa Maasin nga si Urbano Bacolanta maoy nanghawod sa Governor Ecot Petilla Triathlon Cup didto gihapon sa Hilongos.

Gipakita ni Urbano ang iyang impresibong performance sa cycling

aron paglangkat sa titulo. Si Jonas Tan sa Ormoc milandig sa ikaduha, samtang si Roger Tupas mikapyot sa ikatulo.

Gawas nga nidaog sa triathlon, si Bacolanta gitimbaya sab sa organizing Hilongos Unified Bikers Club nga mihatag kaniya og pasidungog  isip  "Best Cyclist" sa maong kalihukan, samtang si Alvin Davido maoy nakakuha sa "Best Swimmer" award.