Warriors, Jaguars nagpabiling hari

Gidispatsar sa University of San Carlos (USC) Spiking Warriors ug sa University of San Jose-Recoletos (USJ-R) Lady Jaguars ang ilang tagsa-tagsa ka kaatbang aron pabiling maglingkod sa trono isip hari sa Cebu Schools Athletic Foundation, Inc. (CESAFI) volleyball event kagahapon didto sa University of Southern Philippines Foundation (USPF) Gym sa Lahug, ning siyudad.

Nagkinahanglan pa og lima ka sets ang USC Warriors ni coach Norvie Labuga una nila gipalagpot ang USPF Panthers aron magpabilin sa ilang mga kamot ang korona sa men's division.

Gitapos sa Warriors ang makutas nga kumbati sa iskor nga 25-23, 18-25, 25-23, 20-25, 15-9.

Sa pikas bahin, ang USJ-R Lady Jaguars ni coach Grace Antigua miharos sa USPF belles sa tulo ka sets, 25-16, 25-19 aron pag-angkon sa talagsaong grandslam title sa women's division.

Sa sayo pa, ang Southwestern University (SWU) Lady Cobras midaog sab sa  ilang kulbahinam nga duwa sud sa lima ka hugna, 25-21, 19-25, 25-27, 25-23, 15-11 aron pag-angkon sa ikatulong dapit sa women's division, samtang ang Jaguars mipukan sa University of the Visayas (UV) Lancers, 25-15, 25-19, 23-25, 25-24 aron pagpahimutang sa ikatulong dapit sa men's division.