Siso siblings, Kintanar nakaangkon lingkoranan sa finals

Nakaangkon og lingkoronan sa finals ang tulo ka Sugbuanong junior tennis players sa tagsa-tagsa nila ka dibisyon sa nagpadayong  Langkawi International Age-Groups Tennis Championships, ang last leg sa 2007 Malaysian Junior circuit kagahapon.

Si Bernardine 'Niño' Siso sa University of San Carlos (USC-South Campus walay kukaluoy nga mimasaker ni Ahmad Deedat, 6-2, 6-0 aron pag-angkon og luna finals sa boys' 14-under class.

Sa pikas bahin, ang igsuon ni Niño nga si Sally Mae nakalukat sab og tiket sa finals human gidemolis si Maya Mametguliyeva, 6-4, 6-1.

Si Niño moharong ni Syed Agil Naguib sa kampiyonato, samtang si Sally Mae nagpaabot pa sa iyang final opponent sa pagsuwat niini.

Ang managsuong Siso nga gipaluyohan sa Prime Structures, USC, Dunlop, Tavos Sports ug Guardo Group of Companies, nagtinguha  og double victory diin midaog sab sila sa ilang  tahas sa semifnals sa doubles competition.

Si Niño ug iyang katimbang nga si Hanifah Rahizam mibasora ni Mhud Vaim ug Ahmad Deedat, 6-1, 6-1 aron makigharong nilang Err Yan sa Malaysia ug Bradler Lucas Lai sa Singapore alang sa title showdown.

Nakasulod sab sa finals sila si Sally Mae ug Maya Mametguliyeva sa Turkmekistan human nila girapido ang paresan nilang Wan Gem sa Kazakstan ug Kairan Buyeva Salima, 6-0, 6-1.

Lain pang Sugbuanon nga miabante sa finals mao si Krissianne Kintanar human midaog batok ni Kim Na Yong sa Korea sud sa tulo ka sets, 6-4, 2-6, 6-4 sa girls' 10-under division. Iyang harungon ang laing Korean bet nga si Kim Da Bin alang sa kampiyonato.