Partner's Cup mosikad na karon

Duha ka kulbahinam nga aksiyon ang  mosugat sa pagsikad  sa Reinforced Partner's Cup karong adlawa diha sa Cebu Coliseum.

Mga duwa karon

(Cebu Coliseum)

  2:00 pm -- DBTC/Unilab Alaxan vs. CIT/Metro Gaisano

  4:00 pm -- USJR/Bibbo Hotdog vs. USPF/R. Lapid’s Chicharon

Unang magsultada mao ang Don Bosco Technology Center (DBTC) Unilab Alaxan ug ang CIT/Metro Gaisano ug sundan dayon kini sa sangka sa topseed USJR/Ribbo Hotdog batok sa USPF/R-Lapid’s Chicharon nga makahatag usab og dugang bulok sa liga.
Kun mopatim-aw  karong adlawa si kanhi PBA star Gilbert Demape nga magsul-ob sa uniporme sa Wildcats, seguradong mohugyaw ang katawhan nga dili gyud magmahay sa ilang gibayad.  Ang Wildcats mopaduwa usab nilang Jumel Lanutan ug Joseph Guangco.
Walay ikapanghambug nga star ang DBTC Greywolves gawas lang kang Lester Sunga apan mabawi ra kini sa panag-abot sa Jaguars ug sa Panthers nga magkaribal usab sa CESAFI.
Tungod kay walay nawala sa ilang line-up, dili tugtan ang Jaguars pagkuha'g alumni apan tungod kay nangamoti man ang Panthers sa miaging tuig, aduna sila’y walo ka alumni nga naglakip  nilang  Ayn Latonio, Rex Mangubat, Elvis Labares, Troy Mercader, Bogart Nemenzo ug Michael Sereño.
Ang Wildcats, Panthers ug ang Greywolves mahimong makakuha og walo ka alumni apan duha lang ang dunganon sa pagpaduwa sa usa kahigayon.
Ang Partner's Cup gimugna nilang Felix O. Tiukinhoy, Jr. ug Atty. Baldomero C. Estenzo  diin ang ilang commissioner mao  si  Ramon 'El Presidente' Fernandez.