Cebu Landmaster, M. Lhuillier mag-ilog sa korona sa MVBA Visayas Division

Ang Cebu Landmaster-Mandaue  nakaipsot batok sa Arthro Kontra Arthritis sa iskor nga 72-64 sa deciding game sa ilang "best-of-three" Visayas Division semifinal series sa 2007 MVBA Second Conference niadtong Lunes sa gabii didto sa Mandaue City Sports and Cultural Complex.

Gitak-op sa Landmasters ang serye sa  baraha nga 2-1.

Gumikan niini, ang Landmasters ni Joe Soberano ug coach Jun Tan maoy nakaangkon og katungod nga makigharong batok sa M. Lhuillier Kwarta Padala sa lain na sab nga "best-of-three" series alang sa Visayas Division title.

Ang Game-1 duwaon karong alas-5:30 sa hapon diha sa Cebu Coliseum.

Seguradong init nga kumbati ang moulbo sa duha gumikan kay  patas  man ang ilang head-to-head record sa eliminasyon. Ang Landmasters midaog sa una nilang engkuwentro, 83-81 niadtong Septiyembre 1, apan nakabawos ang M. Lhuillier sa ilang rematch, 86-76 niadtong Oktubre 19.

Si Bong Marata maoy nangu sa Landmasters bitbit ang 19 puntos, gisundan ni Mike Manigo nga mitali og 12 puntos. Si Mark Yee midonar og 10 puntos alang sa Landmasters nga wala na molingi pa human miposte og 20-9 nga bentaha human sa first quarter.

Igo lamang nakasikit ang Arthro ni sports patron Jonathan 'Atan' L. Guardo ug coach Al Solis sa iskor nga 49-50 gumikan kay mi-resbak man sab dayon ang Landmaster sa daginutong oras sa duwa.

Sila si  Alex Cainglet, Luther Luke Justiniani ug Rino Berame pulos mikimada og tag-10 puntos. Apan ang sinaligan nilang si Doroteo Almacin naminghoy gumikan kay nalimitahan kini ngadto lamang sa dos puntos human mipabuto og 23 puntos sa nag-unang duha ka duwa sa serye.

Didto sa Almendras Gym sa dakbayan sa Davao, ang Holcim Pryce Pharma-MisOr misakmit sa ikatulo nilang sunod-sunod nga korona isip Mindanao Division champion human gipakamang ang MP Warriors-GenSan sa iskor nga 77-65 sa Game-3 sa kaugalingon nilang "best-of-three" series.