Lain na sab nga upset ang nahitabo human midaog ang Fag Machine batok sa top seed Hero Commando sa iskor nga 69-58 sa Power Forty Basketball Tournament Christmas League sa miaging adlaw didto sa Inayawan Sports Complex.
Misaka'g gamay ang Fag Machine sa team standing ngadto sa ikaupat nga dapit sa ilang 4-4 nga baraha, apan ang Hero Commando pabiling nagsolo sa ibabaw nga bahin sa ilang 6-2 win-loss record.
Sila si Gogo Fuentes ug Mario Tabar maoy nangulo sa Fag Machine nagkumboya og 38 puntos. Si Fuentes nipupo og 20 puntos, samtang si Tabar mitapos og 18 puntos.
Si Bobong Rosal maoy nangulo sa pilderong Hero Commando nga mikulit og 16 puntos. Si Peter Lalican wala makabuylo og igo lang kini nakapabuto og kuwatro puntos.
Sa laing duwa, na-upset usab sa UTASSCO ang DJD Eng’g. sa iskor 83-74 aron pagtabla sa ilang baraha sa 2-6.
Si Flor Yosores mikamada og 23 puntos alang sa UTASSCO, samtang si Jun Vernaiz mao usab ang nangu sa DJD Eng’g. sa iyang 26 puntos.
Ang Amihan Bags mipukan sa Christine Traders sa iskor nga 80-70 aron usab pagtabla sa ilang win-loss record ngadto sa 5-3.
Ang Amihan gipangulohan ni Melvin Layon sa iyang 25 puntos ug si Joey Escalon nga nipupo og 20 puntos mao usab ang nangulo sa Christine.